Жангылыкъла

Республиканы Къыраллыгъыны, Нальчикни эмда Билимни кюнлерине жораланнган концертле шахарны кёп жерлеринде ётгендиле. "Восток" кинотеатрны аллында, хар замандача, "Родник" хор жырлагъанды. Жабагъы Къазаноко атлы эстетика арагъа жюрюген къызчыкъла бла жашчыкъла уа усталыкъларын Атажукъ улуну терек бахчасында кёргюзтгендиле. "Биз - Кавказны балаларыбыз! Анга кертичилебиз!" деген ат бла къуралгъан концерт программагъа къатышханла уа уста тепсегенлери эм жырлагъанлары бла къараучуланы ыразы этгендиле.

Быйыл Нальчикни 14-чю номерли гимназиясында 1920 жаш бла къыз окъурукъду.

Хасанияны Фрийланы Рамазанны атын жюрютген 16-чы номерли школу 1 сентябрьде отуз сабийге эшигин биринчи кере ачханды.

«Россей Федерацияда къырал контрольну (надзорну) эм муниципал контрольну юсюнден» 248-чи федерал законнга кийирилген жангы излемлеге кёре, от тюшюуге къоркъуусузлукъну жалчытыу жаны бла къырал инспекторла тохташдырылгъан планнга тийишлиликде учреждениялада профилактика тинтиуле бардырыргъа борчлудула.

Бу кюнледе Къабарты-Малкъарны  кёгетле бла наныкъла ёсдюрген мюлклеринде 100 тонна чакълы алма, эрик, кертме, алыча, шаптал жыйылгъанды.

Къабарты-Малкъарны Жамауат палатасында республиканы бла Санкт-Петербургну Жамауат палаталарыны араларында байламлыкъла жюрютюуню юсюнден келишим тауусулгъанды.

Терек бахчачыла къурагъан «Иги тирлик» деген биригиуюню келечилери бла Россельхозараны республикада бёлюмюнде тюбешиу болгъанды. Анда жемишлени жыйыуну юсюнден хапарлагъандыла.

Жангы окъуу жыл башланды. Энди орамда жюрюген сабийле да кёп боллукъдула. Аны бла байламлы Элбрус районну автоинспекторлары, ОМВД-ны жамауат советини келечилери бла бирге водительлеге жолда сакъ жюрюрге кереклисин эсгерир хыйсапда акция бардыргъандыла.

Биринчи сентябрьден башлап орта профессионал билим берген къырал учреждениялада класс башчылыкъ неда кураторлукъ этген преподавательлеге ай сайын 5 000 сом кёллендириу тёлеуле берилликдиле.

КъМР-ни Правительствосуну председателини биринчи орунбасары Сергей Говоров бардыргъан кенгешде сёз республикада эллени газ бла жалчытыуну юсюнден баргъанды. Жыйылыугъа промышленность, энергетика эм сатыу-алыу министр Шамиль Ахубеков, «Газпром межрегионгаз Нальчик» компанияны башчысы Залим Вороков, районланы эмда шахарланы администрацияларыны келечилери да къатышхандыла.