Къоркъуусузлукъну жорукъларына тюшюндюре

Жангы окъуу жыл башланды. Энди орамда жюрюген сабийле да кёп боллукъдула. Аны бла байламлы Элбрус районну автоинспекторлары, ОМВД-ны жамауат советини келечилери бла бирге водительлеге жолда сакъ жюрюрге кереклисин эсгерир хыйсапда акция бардыргъандыла. Аны чеклеринде жолда сабийле къатышып къаллай бир авария болгъаны билдиргенди, таматала эслирек болургъа кереклиси да эсгертилгенди. Бир-бир окъуучула дерслеге кеч къалыргъа къоркъуп, неда иги ойламай. Жолдан эркин этилмеген жерле бла ётедиле, неда чартлап чыгъадыла. Адамны ингир кезиуде кёрюрге уа бютюн къыйын болады.  

Аварияланы кезиуюнде машинаны ичинде олтургъан гитчеле да биринчи ачыйдыла. Ол а ата-ананы уллу кёллюлюк этгенлерини хатасынданды. Эм биринчиден, аланы энчи шинтикге олтуртургъа неда энчи устройство бла къысаргъа борчлудула ала. Транспортну ичинде сабий кесине жер табалмай барса уа, не хатагъа келтирлиги белгисизди. Аны ючюн тазир тёлерге тюшеригин да унутургъа жарамайды.

Акцияны кезиунде ОГИББД-ны келечилери, сёз бла ангылатханларындан сора да, жолда къоркъуусузлукъну жорукъларындан билдирген брошюрала да юлешгендиле.