Абаданладан - насийхат сёзле, гитчеледен - назмула

Быйыл Нальчикни 14-чю номерли гимназиясында 1920 жаш бла къыз окъурукъду. Пандемия бла байламлы биринчи къонгуроу мында бу жол жаланда 1-чи классда окъурукъ жашчыкълагъа бла къызчыкълагъа эшитдирилгенди. Ала уа быйыл  алты класс боладыла. Аны себепли ала юч кезиуге юлешиннгендиле.  

РФ-ни эмда КъМР-ни гимнлери согъулгъандан сора, омакъ кийинип сюелген сабийлени мектепни директору Римма Жамборова, Нальчик шахар округда бёлюмню таматасы Уяналаны Зураб, КъМР-де Ич ишлени министерствосуну ГИБДД-сыны келечиси Азамат Шухостанов да къызыу алгъышлагъандыла.

Андан сора къызчыкъла бла жашчыкъла назмула айтхандыла. Алексей Толстойну Буратино жомагъындан къысха оюн кёргюзтгендиле. Ахырында сабийлеге биринчи къонгъуроуну эшитдиргендиле. Андан сора жашчыкъла бла къызчыкъла, кенг, жарыкъ, ариу жасалгъан классха кирип, партала артына олтургъандыла. Алагъа Мамырлыкъны биринчи дерси да башланнганды.