Тепсеуле, жырла, конкурсла

Республиканы Къыраллыгъыны, Нальчикни эмда Билимни кюнлерине жораланнган концертле шахарны кёп жерлеринде ётгендиле. "Восток" кинотеатрны аллында, хар замандача, "Родник" хор жырлагъанды. Жабагъы Къазаноко атлы эстетика арагъа жюрюген къызчыкъла бла жашчыкъла уа усталыкъларын Атажукъ улуну терек бахчасында кёргюзтгендиле. "Биз - Кавказны балаларыбыз! Анга кертичилебиз!" деген ат бла къуралгъан концерт программагъа къатышханла уа уста тепсегенлери эм жырлагъанлары бла къараучуланы ыразы этгендиле.

Концерт программа сау юч сагъатха жууукъ заманны баргъанды. Ол жарыкъ да, сейирлик да болгъаны себепли, солуу паркга келгенледен кёпле, алагъа сюелирге тюшгенине да къарамай, ахырына дери къарагъандыла, жырлагъанлагъа бла тепсегенлеге къызыу къарсла бла тюбегендиле.

Къабарты орамда уа жаш жырчыла, поэтле, миллет маданият араланы келечилери, блогерле да жырлап, тепсеп, назмула айтып, алайгъа келгенлени эрикдирмей тургъандыла.

"Мени сюйген Нальчигим" деген ат бла уа сабийлени араларында асфальтда сурат ишлеу конкурс бардырылгъанды.

Той-оюн "Искож", "Александровка", Нальчикде 33-чю номерли мектепни, "Нальчик" аэропортну майданларында да къуралгъандыла.