Терек бахчачылагъа магъаналы ушакъ

Терек бахчачыла къурагъан «Иги тирлик» деген биригиуюню келечилери бла Россельхозараны республикада бёлюмюнде тюбешиу болгъанды. Анда жемишлени жыйыуну юсюнден хапарлагъандыла.

Ведомствону келечилери терек бахчачыланы тирлик жыйыу жаны бла сорууларына жууапла бергендиле, мюлклерине кюзде къалай къараргъа кереклисин да ангылатхандыла.

Тирлик тап жыйылмаса, бахчагъа салгъан къыйынынг зырафына кетгенин бил да къой. Жемиш тереклени хар бирини да кесини энчиликлери болады. Алманы, кертмени да чыкъ къуругъандан сора жыядыла. Кеслерини да бутакъчыкъларын юзмей алай. Алма терк тешилмей эсе, ол энтта да бишмегеннге саналады. Исси кюн жыйылгъан тирликни уа талай заманны ауанада тутаргъа керекди.

Жаз алмала хазна сакъланмайдыла - аны унутургъа керекмейди. Кюз неда къыш алмаланы уа татыу алгъынчы жыяргъа жарамайды. Аны уа къалай билгин? Алманы жарып, йод къошулгъан суугъа салса, ол болгъаныча аллай саргъылдым къалыргъа керекди. Кёксюлдюм бет алгъан эсе уа, анда крахмалы аслам болгъанын билигиз. Аллай алма энтта да бишгеннге саналмайды. Кюз сортла жыйылгъандан сора 50-100 кюн сакъланадыла.  

Кертмелени да оздурургъа жарамайды: ала артыкъ бишселе, эки, юч кюнню ичинде агъып кетедиле. Дагъыда исси кюнледе тирликни терк жыйып бошаргъа керекди.

Эрикле августда бишедиле асламысында. Ала кёбюрек заманны сакъланырча, юслерине жагъылгъан воскну кетерирге жарамайды. Кеслерин да бутакъчыкълары бла жыяргъа керекди.

Тирлик иги сакъланырча жемишлени 0 градус сууукълукъда, хауаны мылылыгъы да 85 процентден аз болмагъан жерде тутаргъа керекди.