Борчун тёлерге ашыкъмайды

Бюгюнлюкде Нальчикде  «Водоканал» биригиу  хайырланнган ток ючюн «Россети Северный Кавказ» «Каббалкэнерго» компаниягъа 156 миллион сом берлиги барды.  Быйыл алты айгъа ол жаланда тёлеулерини 27 процентин толтуралгъанды. Болсада былтыр сагъанылыгъан кезиуде предприятие бир сом да бералмагъанды. 

Саулай алып айтханда,  бусагъатда «Водоканал»  585,5 миллион сом борч этгенди.  Эрттеден бери тёлемегени ючюн андан ахчаны  дау бла алырча иги кесек иш ачылгъанды. Анга кёре «Россети Северный Кавказ»  бюгюнлюкде 591,4 миллион сомгъа 61 иск бергенди. Андан 581 миллион сом  ток ючюн борчду, дагъыда 10,3 миллион  сом а тазир чыкъгъанды.

Алгъаракъда сюдню оноуу бла ол  3,7 миллион сом тёлегенди. Быйыл дагъыда сюд  475,8 миллион сом багъасына 51 искни къабыл этгенди.  Бусагъатда сюдню хайыры бла   «Водоканал» тогъуз производство иш бла байламлы  68,7 миллион сом тёлегенди.  Энтта да он ишге кёре 112 миллион берирге керек болукъду. 

Эсге сала айтсакъ, «Водоканал» Нальчик шахар округда 82 абонентни неда 200 мингнге жууукъ адамны эм 2,2 минг организацияны  ичер суу бла жалчытады эм кир суу саркъырча къарайды. Болсада ток ючюн уллу борчла этгени  ичер суу бла тийишли халда жалчытыугъа чырмаула салыргъа боллугъуна   къоркъуу салады.