«Насыплыла кёбюрек болурларын сюебиз»

Магъаналы кюннге, Саулукъну битеудуния кюнюне (7 апрель), аталгъан материалыбызны биз онлайн халда Москвада «Север +» медицина араны баш врачы, хирург, стоматолог–ортопед Сотталаны Зейтунну жашы Азрет бла хазырлагъанбыз.

– Москвада мындан баргъан адамгъа къыйынмыды ишлеген?

– Ачыкъ айтайым: мен Москвада он жыл жашайма, алыкъа мен Кавказдан болгъаным ючюн жюрек къыйнарча бир сёз эшитмегенме. Тиш доктор уста эсе, кимге сейирди аны миллети?!  Манга алгъа биреу келсе, аны ызындан битеу юйюрю жюрюп башлайды. Стоматологияда иги ишлей билмегеннге къыйын тюйюлдю, бусагъатда конкуренция бек уллуду, манга ышанмасала, къатыбызда клиникагъа барлыкъдыла.

– Сиз Нальчикде университетни медицина факультетин бошагъансыз да?

– Хау, медицина факультетден сора Республикалы стоматология арада интернатурада, Ставропольда ординатурада окъугъанма. Ординатурадан сора бир жыл да болмагъанды мен бир курслада окъумагъан. Бусагъатда имплантла бла кюрешеме, ала бла байламлы битеу жангы затланы тинтеме. Стоматология, жылдан-жылгъа тюрленип, айнып барады, окъумасанг, бек терк артха къаллыкъса.

– Тишле аурусала, асламыбыз аланы багъаргъа ашыкъмайбыз. Аны бла байламлы бизге айтырыгъынг?

– Ол бек осалды. Ауругъан тишле аш орунну, чегилени ишлерин бузадыла. Дагъыда не десек да, тишле адамны сыфатын къурагъан магъаналы затдыла, аласыз  адамгъа ариуду деп, бир инсан да айталлыкъ болмаз. Тишлени сабийликден башлап сакъларгъа керекди, эрттенликде ашдан сора, ингирде жукъуну аллында тазалау, жарым жылгъа бир кере стоматологга барыу жашау марда болургъа керекдиле.

– Хар адамны кесини чач къыркъыучусу, терапевти болгъанча, тиш доктору да болургъа керек болур?

– Керекди, алай аны тапхан алай тынч тюйюлдю. Хар устаны кесини клиентлери боладыла.
 
– Сизни уа бармыды тиш докторугъуз?

– Болмай а! Мени да ауруучудула тишлерим!

– Москвада тансыкъ боламысыз ата юйюгюзге?

– Кенжеде ёсгенме. Атам бла анам – устазла, мен да, эгечим Зулейха да – врачла… Зулейха да Москвадады, Н. Филатов атлы сабий клиника больницада бийик категориялы уролог- андролог болуп ишлейди, медицина илмуланы кандидатыды.

Эгечим да юйюрлюдю, мен да юй бийчем бла эки сабий ёсдюребиз. Алай туугъан, ёсген жериме, юйюме, атама – анама тансыкъ болгъанлай турама, жайда келебиз, солуйбуз, тансыгъыбызны алабыз, алай ол да азды. Не этериксе, жашау жорукъла алайдыла, окъумай, ишлемей, айнымай да къалай тургъун?

– Бир-бир докторла кеслерини жууукъларын бакъмайдыла, таныгъан-ышаннган специалистлерине жибередиле. Сиз а къараймысыз жууукълагъа-тенглеге?

– Мен а къарайма! Жууукъларыбыз да, танышларыбыз да, аланы танышлары да келедиле, къолумдан келгенни аямайма. Кимге болушалсам да, къууанама. Хар акъ халат кийген адамны жашаууну магъанасы саусузлагъа болушууду. Саулукълу адамла насыплыдыла, биз насыплыланы санларын кёбейтебиз.