Жаз башында бютюн бек къозгъалады

Жаз башы бла чууакъ кюнле келедиле, табийгъат жашнап башлайды. Жамауатны иги кесеги бу кезиуню ашыгъышлы сакълайдыла.  Болсада ол бир-бирлеге уллу сынау болургъа тюшеди.  Битимле чакъгъан кезиуде чючкюрюп, жётел этип, кёзлери кичитип, бурун суулары барып жунчугъанла бардыла.  Статистикагъа кёре, кезиулю аллергияладан абаданланы 40 проценти къыйналадыла. Апрель бла май айлада терекле, юлкюле да къыстау чакъгъанда, ол иги да кючлениучюдю. 

Аллергия битим букъудан тышында, адам саулугъуна заранлы затла ашаса, иммунитети къарыусуз болса да къозгъалады.

Кезиулю аллергияны къалай тинтирге болады?

Аллергия деп организм заран салыргъа боллукъ затлагъа къажау турса айтылады. Аллергенле организмге сингселе, адамны иммунитети бла байламлы системасы антигенлени къурутургъа кюрешип башлайды. Аны кезиуюнде «гистамин» деген белок кёп жайылып тебирейди. Аллергияны кезиуюнде адамны жунчургъа тюшгени да анданды.

Аллергияны къозгъагъанлагъа: тюрлю-тюрлю химияны, дарманланы, битимледен этилген аберилени, бир къауум аш-суу продукцияны, битим букъуну эм мугутну санаргъа боллукъду. Аланы хар бири бла ауруу кесин башха-башха билдиреди. Аны себепли тийишли халда багъарча сылтауун тюз билирге керекди.

Кезиулю аллергиядан эм биринчи кёзле къызарып, кичитип эм жиляп башлайдыла. Адамны тамагъы аурургъа эм бурун суу барыргъа да болады. Бир-бир кезиуледе саусузну териси иги да къургъакъсыргъа, чапырыргъа эм кичитирге да боллукъду.

Бир къауумлада бирге ушагъан интоксикация башланады – санлары къарыусуз болады, башлары айланады, терк арыйдыла, кёллери бокъланады, тер басады. Къургъакъ жётел этгенлени уа астмалары башланырына уллу къоркъуу сакъланады.

Аллергияны кесекле бла ажашдырмазча, башында сагъынылгъан шартла бла бирге температура кётюрюлмегин эсде тутаргъа борчлуду. Респиратор ауруула 7-10 кюнню ичинде ётедиле, поллиноз а бир ай чакълы сакъланады. Къалай-алай болса да, тийишли халда багъылырча, саусуз созмай врачха къаратыргъа керекди. 

Аллергия бек къыйнмазча

Къайсы  багъыу да тюз диагноздан башаланады.  Аны себепли саусуз антителалары болгъанына ишекли болмазча, лабораторияда тинтирча къан берирге керекди. Эм игиси пробала терисинден алынсалады, аны хайыры бла терк окъуна аллергенни табаргъа эм анга кёре багъарча амал излерге    жарайды.

Аллергенледен узакъ турургъа кюрешигиз

Аллергиягъа тийишли халда къажау турурча аллергенледен узакъ турургъа кюреширге керекди. Аллай амал юйде хайырланнган химиядан, жаныуарланы жюнюнден эм аш-азыкъ продукция бла байламлы бир къауум затдан сакълайды. Табийгъат чакъгъан заманда кесин сакъларгъа уа адамгъа бек къыйынды.

Дарман бла багъыу

Дарман бла багъыу жаз башында къозгъалгъан аллергиядан иги болушады. Препаратла адамны халин игилендириуде кертиси бла да себеплик этедиле.   Алай аллергияны сау этип къоярча къолларындан келмейди.  Аны бла бирге ала къаты препаратлагъа саналгъанлары себепли, саулукъгъа уллу заран салыргъа боллукъдула, ол себепден врач айтмай ичерге жарамайды.

Адамланы кёбюсю антигистамин препаратланы къыйналып болалмасала   ичип тебирейдиле. Болсада специалистле багъылыр амалны битимле чакъгъынчы 2-3 ыйыкъгъа алгъа башларгъа кереклисин эсге саладыла. Аны бла бирге аллергикни организми бир дарманнга терк юйренеди. Ол себепден аны терк-терк алыша турса игиди. 

 Диетаны сакълай билсе игиди

Ауруу къозгъалса, саусузну хали бютюн аманнга кетмезча диетаны сакъласа игиди. Ол санда гипоаллерген тахта кёгетлени бла жемишлени ашаргъа керекди. Сёз ючюн, аны кезиуюнде бал, къозу, цитрус, шоколад, татлы суула, къызгъылдым эм экзотика кёгетле рационнга кирмезге керекдиле.  Аны бла бирге тюрлю-тюрлю мирзеулени эм айранны хайырланса игиди.  Ол поллинозну къорууларгъа эм иммунитетни кючлерге болушурукъду.

Аллергияны къорууларгъа болушурукъ шартла:

1. Битимле букъу этген кезиуде, тышына азыракъ чыгъаргъа кюреширге керекди. Эшикге жел урмагъан заманда, эм игиси уа ингирде чыкъса игиди; Тышына чыкъгъанда,  адамны юсю-башы да игирек жабылырча кийинирге керекди. Аны бла бирге кюнден сакъларча кёзлюк, къалпакъ, узун женгли кийим кийсе да себеплик этерикди; Терезелени ачмаса эм кийимлени да эшикде къоймаса игиди; Эшикден киргенлей сапын бла бет-къол жууаргъа унутмагъыз; Аллергияны заманында косметика, парфюм эм дарман кырдыкладан чайла да жарамайдыла; Юйде ит, киштик да аллергияны къозгъаргъа боладыла. Ол себепден табийгъат аланы терк-терк жуундура турса тюздю; Кюн сайын юйню тюбюн мылы быстыр бла сипаргъа, хауаны тазалагъан устройстволаны хайырланыргъа керекди.

Эсге сала айтсакъ, адамны бир тюрлю затха аллергиясы жашау баргъан чакъда сакъланыргъа болады. Ол сенбепден аллергикле саулукъларына бютюн сакъ болургъа тийишлидиле.