Республикада 70 аслам социал магъаналы жерлени къурулушлары бардырыллыкъды

КъМР-ни Башчысы Казбек Коков Москвагъа ишчи жумуш бла барып келиуюню юсюнден жыйылыу бардыргъанды. Ол анда Россейни Правительствосуну вице-премьери Марат Хуснулинни башчылыгъында бардырылгъан семинар-жыйылыугъа къатышханды, анда къурулуш бёлюмню эм жашау-коммунал мюлкню айнытыу бла байламлы соруулагъа къаралгъанды. 

Жыйылыугъа КъМР-ни Правительствосуну Председатели  Мусукланы Алий эм КъМР-ни Башчысыны Администрациясыны таматасы Мухамед Кодзоков къатышхандыла.

Казбек Коков регионну правительствосуна уллу борчланы тамамларгъа 2022 жылда кириширге керек болгъаны себепли, бир ненча буюруу бергенди.

Тамамланырыкъ ишлени асламысы саулукъ сакълауда, маданиятда, билим бериуде, спортда эм жашау-коммунал мюлкде эм тёгерекни тапландырыуда бардырыллыкъдыла.

Андан сора да, Башчы инвестиция- къурулуш ишлени бардыргъанда аланы болжалларын къысхартыргъа эм къагъытларын хазырлагъанда административ тыйгъычланы азайтыргъа борч салгъанды. 

«Келир жылда жетмишден аслам социал магъанасы болгъан объектни къурулушун башларыкъбыз, аланы хар бирини багъасы проектине кёре, 50 миллион сомдан тебиреп, эки миллиард сомгъа жетеди», - дегенди Къабарты-Малкъарны Башчысы, магъаналы бёлюмлеге эс бурургъа кереклисин ангылата.

Андан сора жууукъ заманда тамамланырыкъ ишлени, техника, инженер эм ишчиле бла жалчытыуну юсюнден соруула сюзюлгендиле.

Саулукъ сакълауда жангы онкология диспансерни къурулушун  андан ары бардырыргъа мурат барды, Нальчикде уллу поликлиника ишленирикди.  

 Нарткъалада, Прохладныйде эм Куба-Табада быйыл кюз артында ишлеп башланнган школланы къурулушлары  бошалыргъа керекди. Андан сора да, жети школну къурулушун бардырыргъа мурат барды, ала Нальчикде,       Прохладныйде, Бахсанда,   Майский шахарда,  Красносельское элде, Сармаковода эм Псынабода ишленирикдиле.

Келир жылда тынгылы ремонтну программасына элледе орналгъан 25 школ киреди. «Театрланы  мекямлары» деген объектде къурулуш ишлени бошар мурат барды эм спортну къыш тюрлюлеринде жарау этерге жарарыкъ объектни ишлеп башларыкъдыла.

Суу бла жалчытыу эм суу илипинлени ишлеу бла проектле  бардырыллыкъдыла, аланы баш муратлары- республикада жашагъанланы качестволу суу бла жалчытыуду. Бахсаннга дери суу тартыллыкъ быргъыланы узунлугъу 77 километр болады, ол кеси да эм уллу къурулуш объектге саналады.   

Казбек Коков белгилегеннге кёре, жашау журтла ишлеу эм жоллада къурулуш ишлени бардырыу республикагъа магъаналы бёлюмледен бири болгъанлай къалады. Быйылгъы жылда 500 минг квадрат метр жашау журт хайырланыргъа берилликди, келир жылда 530 минг квадрат метр.

Миллет проектни чеклеринде бардырылгъан  «Къокъуусузлу качестволу жолла» деген программагъа кёре, ишленирге керекли 183 объектден 170 ишле бошалгъандыла.  Келир жылда муниципал эм регионал жоллада ремонт ишле андан ары бардырыллыкъдыла,  ол санда республиканы ара шахарында Кабардинская орамда, Шогенцуков, Ленина, Кулиева атлы проспектледе эм башха орамлада.

Казбек Коков белгилегеннге кёре, республикада аллай бир объем бла къурулуш ишле арт 40 жылны ичинде бардырылмагъандыла.

«Россейни Президенти Владимир Путинни эм Правительствосуну хайырындан федерал эм регион проектлени  бардырыргъа онг болгъанды, аланы магъаналары - Къабарты-Малкъар Республикада жашагъанланы жашауларын игилендириудю», - деп четгенди республиканы онучусу.  

 «Бир ызгъа аллай бир жангы проектлени бардырыу бизге мигле бла ишчи жерлени къураргъа онг берликди, эм республиканы бюджетине къошакъ халда налог тёлеуле, аны ызындан келген инвестиция онгла да. Бу иш уллу жууаплылыкъды, болсада белгиленнген  ишлени тамамларыкъбыз, анга деп тийишлисича хазырланыу ишле  бардырылгъандыла»,- дегенди Башчы, деп билдиреди республиканы оноучусуну пресс-службасы.