Эки жанына да магъанасы болгъан тюбешиу

Къабарты-Малкъар Республиканы Башчысы Казбек Коков Москвада Россейни бла Узбекистанны арасында байламлыкъла жюрютюу бла байламлы бардырылгъан экинчи регионла аралы форумну пленар жыйылыууна къатышады.

Кенгешге Россей Федерацияны экономиканы айнытыу министри Максим Решетников, Узбекистан Республиканы премьер-министрини тыш къыралла бла экономика байламлыкъла эм инвестиция  жаны бла орунбасары-инвестицияла  эм сатыу -алыу министри Сардор Умурзаков, Россейни он регионуну таматалары (Къабарты-Малкъар Республика, Самара область, Еврей автоном область, Карелия Республика, Ставрополь край, Омск, Свердловск, Ульяновск, Челябинск эм Ростов областла), Узбекистанны регионларыны таматалары.

Форумгъа къатышханлагъа Россей Федерацияны Президенти Владимир Путинни этген алгъыш сёзюнде былай атылады: «Россия Узбекистан бла сатыу- алыу байламлыкъланы бек къаты жюрютгенледен  бириди, аны тыш къыралла бла татыу-алыу этген ёлчеминде экинчи жерни алады.

 Жукъгъан аурууланы жайылгъан кезиулеринде окъуна, бизни экономика байламлыкъларыбыз тохтамагъанлай айныгъанлай барадыла.  Озгъан жылда сатыу-алыу ишлерибиз 16 процентге кёбейгенди эм 6 миллиард долларгъа жууукълаша келеди».

Узбекистанны Президенти Шавкат Мирзиеев алгъыш сёзюнде Россей  Федерация Узбекистанны экономикасына эм уллу салымла этген къыралгъа саналгъанын чертгенди. «Шёндю россейли инвестицияланы бизни къыралда жыйылгъан ёлчемлери 10 миллиард доллардан асламды эм ёсюп барады.

Сёзсюз, регионла бла байламлыкъ жюрютюу айнытыуну анадан ары ёсдюрюрге онг береди. Биз мындан арысында да инвестиция онгланы тап хайырлана промышленностьда, эл мюлкде, нефтехимияда, женгил промышленностьда, фармацевтикада эм башха бёлюмледе бирлешип бизнес-проектлерибизни бардырлыкъбыз»Форумну чеклеринде Россейни бла Узбекистанны  регионларыны башчылары байламлыкъланы къалай бардырыгъа боллугъуну юсюнден сёлешегендиле.

Къабарты-Малкъар Республикагъа Узбекистан эм магъаналы сатыу-алыу этген эм экономика жаны бла байламлыкъ жюрютген республикагъа саналады.

Белгилерчады, 2019 эм 2020 жыллада Узбекистан Республика бла тыш сатыу-алыу этген ишле 59 процентге ёсгендиле.  Он эки процентге экспортну ёлчеми кётюрюлгенди, ол санда Узбекистан Республика бла бардырылгъан сатыу -алыу ишле 40 процентни тутхандыла.      

Къабарты-Малкъар Республикадан Узбекистаннга жиберилген экспорт товарланы санына асламысында инструментле, тюрлю- тюрлю улоула, бичакъла, крахмал, агъач эм андан этилген затла эм кондитер изделияла.      Узбекистандан Къабарты-Малкъаргъа  мамукъдан этилген затла,  какао  эм татлы ашарыкъла келтириледиле. Бурурннгу жыл   Ташкентде Къабарты-Малкъардан баргъан предпринимательле бла уллу тюбешиу болгъан эди, 2020 жылда уа Узбекистанны келечилери бизни республикагъа ишчи жумуш бла келгендиле.   

Агропромышленный комплексде бла  туризмде   инвестиция   байламлыкъланы хайырланыргъа  белгиленеди.  Юсюбюздеги жылны ноябрь айына «КъМР-де предпринимательлик ишге себеплик этиу арада»   Къабарты-Малкъарны бла Узбекистан Республиканы  предпринимательлерини тюбешиулери боллукъду. Анда  сатыу-алыу эм экономика байламлыкъланы айнытыу соруула сюзюллюкдюле, деп билдиргендиле КъМР-ни Башчысыны бла Правительствосуну пресс-службасындан.

Бизни корр.

 

 

 

 

 

 

Поделиться: