Къабарты-Малкъарда дарман салдыргъанланы саны ёсгенди

КъМР-ни Башчысы Казбек Коков регион правительствону жыйылыуун бардыргъан заманда коронавирус инфекциягъа къажау дарман салдыргъанланы саны иги да ёсгенин чертип айтханды.

- Ангылатыу иш, чек салыу мадарла да хайырлылыкъларын кёргюзтедиле. Арт он кюнню ичинде вакцина этдиргенлени саны эки кереге ёсгенди. Бир кюннге дарман салыучу пунктлагъа эки минг чакълы  адам келеди, - дегенди Казбек Коков.

Къабарты-Малкъарны Башчысы арт кюнлени шартларын да туура этгенди: «Кюн сайын 130 адам госпитальлагъа салынады. Болсада ауруу бек уллу жайылгъанды дерча тюйюлдю. Госпитальлагъа тюшгенлени бла сау болуп чыкъгъанланы саны тенг бола келеди. Хал тутхучлуду, медучреждениялагъа жетген ауурлукъ да эсепде тутарчады деп айтыргъа боллукъду. Аны алайлыгъы биз этген мадарланы хайырынданды».

«Бу ишни хар жаны бла да селейтмей бардырыргъа керекди. Алай болса, жууукъ 10-15 кюнде биз халны тюрленнгенин сезерикбиз», - дегенди ахырында республиканы оноучусу.