Жангылыкъла

Къабарты-Малкъарда «Эко-Гармония» жамауат организация «Батарейки, сдавайтесь!» деген акцияны дайым бардыргъанлай турады. Бу ишни чеклеринде электротоварла сатыу бла кюрешген тюкенледе, билим бериу эмда багъыу учреждениялада эски батарейкаланы жыйгъан пунктла къурайдыла.

Къабарты-Малкъар къырал университет «Блокадалы гыржын» аты бла битеуроссей эсгериу акциягъа къошулгъанды. Анга жоралап, китапханада энчи кёрмюч къурагъандыла. Анга къараргъа бизни жерлешибиз, поэт, аслам жырланы автору эм жырчы Ефрем Амирамов да келгенди. Ол жаш телю аудиториягъа назмула окъугъанды эмда кёрмючню къурагъанлагъа жюрек ыразылыгъын билдиргенди.

Кёп болмай Къабарты-Малкъар  бийик-тау заповедникде «Аманатлы  Къабарты- Малкъар» республикалы  экология проектни чеклеринде «Биз - аманатлы шуёхлабыз» деген акция  болгъанды. Анга  Мечиланы Кязим атлы жаш тёлю  библиотеканы келечилери эм  Нальчикни 12-чи номерли орта школуну окъуучулары бла устазлары да къатышхандыла.   

Аушигерде Совет Союзну заманында ишленнген бир  атлы  пансионат иги да тозурагъанды. Болсада келир эки жылда ол жангыртылып, бюгюннгю излемлеге келиширча этилликди, деп билдириледи Черек муниципал районну администрациясыны пресс-службасындан. 

Автомашина жоллагъа къарагъан «Кавказ» Управленияда регионда къар аслам жаууп башланырына дайым хазырдыла. Ведомствода ышандыргъанларыча,  анга деп туздан бла юзмезден аслам къыстырыкъ этгендиле, ГИБДД, МЧС, МВД, Гидрометеорология ара бла да кече-кюн байламлыкъда ишлейдиле.

Республиканы жолларын  тапландырыу эмда тийишли излемлеге келишдириу ишле къыстау барадыла. КъМР-ни  тийишли  Управлениясындан билдиргенлерине кёре, подряд организацияланы  специалистлери Хасания - Герпегеж  жолну бир-бир жерлерин кенгертиу эмда жанларын тазалау бла кюрешедиле. 

Чегем «Гитче шахарланы  бла эллени болумларын игилендириу» деген битеуроссей конкурсха къатышыргъа хазырланады.  Анда хорлагъан 60 миллион сомгъа тийишли боллукъду.

Кёп болмай Къабарты-Малкъар къырал университетде «Моданы технологиясы» компетенцияда «Жаш профессионалланы» (WorldSkills Russia) чемпионатына къатышырыкъланы айырыр муратда  конкурс бардырылгъанды. Алай бла тиширыулагъа аламат кийимле тикгенлери ючюн финалгъа алты къыз чыкъгъандыла.

                                                                               Законлада тюрлениуле
 
Быйыл къыралны законодательствосунда аслам тюрлениуле сингдирилгендиле, деп билдиргендиле КъМР-де МФЦ-ны пресс-службасындан. Электрон урунуу китапчыкъла, ана капиталны кёбейтиу, налогла, автомашиналаны регистрациясы, льгота ипотека эм кёп башха сфералада жангы жорукъла сакълайдыла.

Австралияны къыбыла жанында, Виктория къумну ортарагъында, жерни тюбюнде Кубер-Педи деген шахтёр шахарчыкъ орналыпды. Анда жашагъан миллетни тиллеринден ол «акъ адамны дорбуну» деп кёчюрюледи. Анда кюнню иссилиги 50 градусха жетеди, ол бек къызыугъа да саналмайды. Адамла къум боранлагъа да юйреннгендиле.