Экономика

Быйыл Къабарты-Малкъарда «Къурулуш» программагъа кёре  1,6 миллиард сом  багъасына жашау журт ишленнгенди. Ол былтыр бу заман бла тенглешдиргенде, юч кереден   кёпдю, деп билдириледи Кавказстатдан. 

Шимал Кавказстатны эсеплерине кёре,   быйыл  Къабарты-Малкъарда 3,4 миллиард сом  багъасына  эл мюлк продукция  чыгъарылгъанды. Былтыр бу заман бла тенглешдиргенде ол 102,1 процентге кёпдю.  

Эл мюлк органика производствода, битимчилик эмда малчылыкъ мюлкле, жарашдырыучу предприятияла бары да бир бирлери бла байламлыкъда ишлейдиле. Арада информация бла шагъырейлениу, кеси эркинлиги бла сертификацияны ётюу – ол бары да хайырланыучуну качествосу аламат болгъан, жарашдыргъанда тёгерекдеги къудуретге заран салмагъан продукцияны  сатып аллыгъына ышандырады.

Бизни республикада ёсген мирзеулюк битимлени арасында энчи жерни нартюх алады дерге боллукъду. Аны ёсдюрюу бла кюрешгенлеге нартюх урлукъну иги тирлик берген, ауруулагъа, къыйын табийгъат болумлагъа чыдамлы болгъан тюрлюлерин хайырланыргъа тийишлиди, дейдиле КБНИИСХ-де.

РФ-ни Федерал налог службасы къыралда  бир тиширыу предпринимательлени санын, ала не бла кюрешгенлерин тинтгенди. Гитче эмда орта бизнесни реестринде бюгюнлюкде 3,31 миллион предприятие барды, ол санда 1,33 миллиону – тиширыуланы иелигиндедиле. Кеслери иш къурагъанладан а 1,8 миллион адам барды да, андан 747 минги да аладыла. Ведомствода тергегенлерине кёре, экинчи тизмедеги тиширыула ишлеген хакъны ёлчеми 100 миллиард сомдан атлагъанды.

Энчи предприниматель патент алырча, заявленияны жангы формада берирге керекди. Онбиринчи январьда кийирилген тюрлениулеге кёре, энди инсаннга анда къайда жашагъанын неда къайда тургъанын билдирирге кереклиси жокъду, дегендиле Федерал налог службаны КъМР-де Управлениясында.

Май районда «Ленинцы» эл мюлк кооператив жетишимли ишлегенли бу кюнледе 92 жыл толгъанды. Анда уруннганла мюлкню кезиулю байрамын ишлеген жерлеринде белгилегендиле, деп жазадыла «Майские новости» газетни бетлеринде.

Былтыр Къабарты-Малкъарны агропромышленный комплексини  бёлюмлери  61,4 миллиард сом багъасына продукция чыгъаргъандыла. Ол буруннгу жыл  бла  тенглешдиргенде он процентге кёпдю.  

КъМР-ни Эл мюлк министерствосундан билдиргенлерича, «Халкъла аралы  кооперация эм экспорт» миллет проектге кирген  «АПК-ны продукциясыны экспорту» деген республикалы  программагъа  кёре  былтыр  4,2 минг гектар жерде  сугъарылырча мадар этилгенди. Буруннгу жыл бла тенглешдиргенде ол 2,6 кереге кёпдю.

Былтыр  Росстат бардыргъан рейтиннге кёре, Къабарты-Малкъар промышленный производство бёлюмде ахшы эсеплери ючюн  Россейни  жети алчы регионуну санына къошулгъанды.