«Ленинцы» мюлкню урунуу жолу сау ёмюрге жууукълашады

Май районда «Ленинцы» эл мюлк кооператив жетишимли ишлегенли бу кюнледе 92 жыл толгъанды. Анда уруннганла мюлкню кезиулю байрамын ишлеген жерлеринде белгилегендиле, деп жазадыла «Майские новости» газетни бетлеринде.

Эл мюлкде къармашханланы юсюнден айтханда, журналистле бирде: «Озгъан жыл бек къыйын болгъан эди…» деген сёзлени хайырланыучудула. Жерчиликде, малчылыкъда уруннган адам аны эшитсе, жаланда ышарып къоярыкъды: табийгъатны кючюне не зат айтырыкъса. Бир жыл къургъакълыкъ къысар, башха жыл а желле, жауунла къоранчлагъа келтирирле.

Алай бла бу мюлкге озуп кетген жыл бек уллу сынаула келтиргенди дерчады. Жаз башында жер бузлап, битимле чыкъмай къалырла деген къоркъуу болгъан эди. Ызы бла  жайда  къургъакълыкъ башланнганды. Аны юсюне уа буз уруп эмда жел кётюрюлюп нартюх сабанлагъа, терек бахчалагъа кёп хата салгъандыла. Къышда къар хазна болмагъаны да кюзлюклени тозуратмай къоярыкъ тюйюлдю.

Бу мюлкде битимчилик бла не заманда да тири кюрешгендиле. Буз уруп тозуратхан нартюх сабанланы талай жерлеринде урлукъну жангыдан себерге тюшгенди. Аны хайырындан тирлик да иги болгъанды. Сояны да хатасы жокъду. Чёплеуден а гектар сайын 24 центнер жыйылгъанды. Ол да иги кёрюмдюге саналады. Саулай айтханда, онеки минг тоннадан артыкъ мирзеу жыйылгъанды былтыр.

Бузну хатасындан кюзлюк будайдан бла нартюхден бир мингден артыкъ тонна тас этилгенди. Бахчалада бир-бир терекле жукъгъа жарамазча болгъан эдиле. Алай дагъыда жемишледен 2,5 минг тонна жыяргъа къолдан келгенди. Ол асламысында кертме, алыча, эрик. Къатдырылгъан эрикден да 60 тонна жарашдырылгъанды.

Сагъынылгъан чырмаула сютню производствосуна да жетгендиле. Бу иш кооперативде эм файдалыгъа саналады. Жылдан- жылгъа аслам сют сауула барады. Буруннгу жыл мюлк андан 4698 тонна жарашдыргъан эсе, былтыр ол 4806 тоннагъа жетгенди.

Коронавирус ауруу жайылгъаны да хата салгъанды ишге. Мартда битеу рынокла жабылгъанлары бла байламлы тауукъланы барын да сатып кетерирге тюшгенди. Алай ол иш унутулуп къалмагъанды, жарашдырыучу цехле алгъынча къармашадыла. Сют завод бир суткагъа 10-11 тонна продукция чыгъарады. Къыйма этиучю цех а аны жыйырма тюрлюсюнден бир жылгъа 100 тонна жарашдырады.

Мюлкню техника жаны бла онгларыны да хатасы жокъду. Быйыл анда 60 миллион сом багъасына мирзеуню къургъакъсытхан оборудование эмда урлукъ сепген бир трактор сатып алгъандыла. Аны бла чекленип къалмай ,энтта да мадар этер умут барды.

Кооперативни башчылары мюлкде уруннганлагъа тийишли кёзден къарайдыла, къыйынларына багъа бере биледиле. Къолайсыз неда кёп сабийли юйюрлеге бютюнда сакъ боладыла. Былтыр алагъа эмда эллилеге болушлукъгъа жети миллион сом бёлюннгенди.

Ма алай кооператив туугъан кюнюн тири къармашыуда тюбегенди. Анда кёп жылланы ишлеп келгенле, жаш тёлю да, къыйын табийгъат болумлагъа къарамай, борчларын жарыкъ бетли тамамларгъа, мюлкню иги атын бузмай урунургъа кюрешедиле.