Экономика

Кёп болмай видеоконференция халда  Россейни промышленниклери бла   предпринимательлерини Шимал - Кавказ федерал округда координация советини кенгеши бардырылгъанды. Анга КъМР-ни  Правительствосуну  Председатели  Мусукланы Алий, экономиканы айнытыу  министр Рахайланы Борис  эм  промышленность, энергетика эмда  сатыу-алыу министр  Шамиль Ахубеков да кътышхандыл. Аны юсюнден  КъМР-ни Экономиканы айнытыу министерствосуну пресс-службасындан билдиргендиле.

Шимал-кавказстатны эсеплерине кёре, былтыр Къабарты-Малкъарда малчылыкъ бла байламлы аслам продукция чыгъарылгъанды. 

Ара шахарда биржаны билдириуюне кёре, Къабарты-Малкъарда жашагъанла, озгъан жылны ахырына он мингден артыкъ энчи инвестиция счёт ачхандыла. Саулай Шимал Кавказда уа аланы саны жюз мингден атлагъанды.

КъМР-ни Эл мюлк министерствосуну башламчылыгъы бла бардырылгъан   «Комплекс халда эл жерлени айнытыу» къырал программагъа кёре эки жылны ичинде республикагъа  227,38 миллион сом болушлукъ берилликди.  Аны асламысы, неда   225,106 миллион сом чакълысы, федерал бюджетден бёлюнюрюкдю, республикада кесинден да    2,274 миллион сом къошарыкъды. Аны юсюнден  профильли ведомствону  пресс-службасындан билдирелдиле.

Былтыр Къабарты-Малкъарда  1380 гектар чакълы бир жерде терек бахчалыкъла   салгъандыла. Ол  «Къабарты-Малкъарда эл мюлкню айнытыу эм эл мюлк продукцияны, сырьёну эм аш-азыкъны  рыногун къурау» деген  къырал программада белгиленнгенден   эсе 110 процентге кёпдю. 

Республиканы мюлклеринде алма, кертме, эрик, шаптал эм башха  жемиш терекледен сора да,  наныкъны эм жилекни да аслам саладыла. 

Россейни Эл мюлк министерствосунда  айтханларыча, республика  терк айныгъан терек  бахчалыкъланы  орнатыу беш биринчи регионну тизмесине киреди.  

Былтыр «Россети Северный Кавказ» компанияны бёлюмю «Каббалкэнерго»  болжалдан кеч  къалмай  226 миллион сом   налог  тёлеп, жылны борчсуз бошагъанды,  деп билдиредиле  энергокюч компанияны пресс-службасындан. 

Кёп болмай  Чегем муниципал районну администрациясыны башчысы Юра Борсов  «Овощи Ставрополья»  биригиуню таматасы   Дмитрий  Мугер бла тюбешгенди. Ала  быйыл Чегемде 100 гектарда «Дары Кавказа» деген жемиш эм наныкъ ёсдюрген  республикада эм уллу теплица комплексни   ишлерча планны сюзгендиле.  Аны юсюнден бизге жерли-жерли администрацияны пресс-службасындан билдиргендиле. 

Быйыл Къабарты-Малкъарда онбир айгъа промышленный  производствону индекси  111 процентге жетгенди, деп билдиредиле  Севкавстатны пресс-службасындан. Экономиканы бёлюмлерин  энчи алып айтханда, табийгъат байлыкъланы хайырланыу - 78,6 процентге, жарашдырыучу производство  -109,3 процентге, ток, газ эм пар, хауа бла жалчытыу - 123,5 процентге, суу бла жалчытыу, къалгъан-къулгъанланы кетериу  да 82,1 процентге ёсгенди.      

Былтыр Къабарты-Малкъарда  сют  малчылыкъ бёлюмде  къармашхан мюлклени барысы да  бирге   537,5 минг тонна сют сатхандыла. Буруннгу жыл бла тенглешдиргенде, ол 104,5 процентге кёпдю, деп билдиредиле Кавказстатдан.

Быйылгъы  жылны аллында белгиленнген эсеплеге кёре,   Россельхозбанкны Къабарты-Малкъарда бёлюмю (РСХБ)  гитче  эм орта  бизнесде къармашхан предпринимательлеге   766 миллион  сомдан аслам ёнкюч бергенди.   Аны юсюнден бизге  финанс  учреждение пресс-службасындан билдиргендиле.

Былтыр банк  инвестиция  проектлени, кезиулю ишлени бардырыргъа, техника алыргъа эм башха жумушланы тамамларгъа   гитче эм орта бизнесни келечилерине 677 миллион сом  эм микропредпринимательлеге да 99 миллион сом   бёлгенди.