Эсепле къууандырадыла

Ток юла жалчытыу  сылтаусуз болурча 

«Россети Северный Кавказ» – «Каббалкэнерго» биригиу  жылны биринчи айларында окъуна    бир миллиард сом багъасы  ток бла жалчытханды. Ол, саулай алып айтханда,  77,6 процентден аслам болады.  Былтыр бу заман бла тенглешдиргенде  электрокюч ючюн тёленнген ахчаны ёлчеми  205 миллион сомгъа кёбейгенди.

Ток бла жалчытхан компаниядан билдиргенлерича,ток ючюн  заманында тёлегенлени биринчи тизмесине   мюлк предприятияла киредиле. Ала  106 миллион сом берип борчларын жюз процентге жапхандыла. Промышленный эм аллай болмагъан  предприятияла да  243 эм  206 миллион сом бергендиле. Алай бла ёнкючлерини   99,8 эм  91,2 процентин  жапхандыла. Энчи адамла да борчларыны 306 миллион сомун неда  87,6 процентин тёлегендиле. 

Бирси кезиуледеча эм проблемалы хайырланыучулагъа жашау журт-коммунал мюлк предприятияла саналадыла.  Ала сагъынылыгъан кезиуде жаланда  54 миллион сом бералгъандыла неда 24,3 процентни.  

Къысха заманнга – ахшы кёрюмдюле   

«Россети Северный Кавказ» - «Каббалкэнерго» биригиуню эсеплерине кёре, быйыл жылны аллында эм жетишимли ишлеген бёлюмюне  Прохладныйни электросетьлери саналгъандыла.  

Сагъанлыгъан кезиуде  ол  токну хайырланнганладан  43 миллион сом неда 101 процент  жыялгъанды. Ол былтырны  бу заманы бла тенглешдиргенде  13,6 миллион сомгъа неда  21 процентге кёпдю.

Абонентледен эм иги  федерал бюджетден жалчытылыннган организацияла тёлегендиле. Ала борчларын  166 процентге жабалгъандыла. Ызы бла ахча республикалы эм  эм жер-жерли  бюджетледен берилген организацияла  барадыла. Мында  да 120 эм 101 процент ёсюм эсленеди. Промышленный эм аллай болмагъан биригиуле да борчларын   99  эм 93 процентге жапхандыла. Эл мюлк предприятияла энчи алып айтханда ала ток ючюн  111 процент тёлегендиле.  Энчи арбазла да  99 процентни жапхандыла.  

Бюгюнлюкде бёлюмню учатогуна   15 минг арбаз бла  685 биригиу киреди.  Орта эсеп бла алып айтханда,  бир айгъа  районну  абонентлери    31 миллион сом багъасына 6,5 миллион  кВт*ч къоратадыла.

Энергетикледен ачыкъ дерс бардыргъандыла

Кёп болмай «Россети Северный Кавказ» – «Каббалкэнерго» биригиуню  Урван районда  электросетьлерини келечилери   «Радуга» республикалы  сабий арада реабилитацияны ётген школчулагъа ачыкъ дерс бардыргъандыла. Ол  электрокюч бла байламлы къоркъуусузлукъгъа жораланнганды.  

Бу жол къонакъгъа  сынамлы специалистле бла бирге  КъМКъАУ-ну «Предприятияланы энергокюч бла жалчытыу» факультетини экинчи курсуну студентлери да келгендиле. Ала  электроэнергия бла жалчытхан объектлени тийресинде кеслерин къалай тюрлю жюрютюрге кереклисин эм юйде да ток бла ишлеген аберилени хайырланнганда   уллу кёллю болмазларын  билдиргендиле.

Аны бла бирге «къоркъуусуз селфи» деген тематика да  тынгылы сюзюлгенди. Ол санда ток чыбыкъ юзюлсе  адам кесине хата салмазча не этерге кереклиси да ангылатылгъанды.  Жаш энергетикле уа школчула бла бирге назму халда къоркъуусузлукъну жорукъларын эсге тюшюргендиле.

Ызы бла дерсни практика кесегинде  сабийлеге биринчи болушлукъ берирге  юйретгендиле. Специалистле айтханнга кёре, заманында эм тийишли халда себеплик этилсе  ток ургъан адамны ёлюмден сакъларгъа онг барды.   Георгий –  манекенни хайыры бла реанимация къалай бардырылгъанын тынглы кёргюзтгендиле. Ызы бла окъуучула да  Гошагъа болушлукъ берип кеслерини билимлерин  сынап  кёргендиле. Андан сора да, жорукъланы билдирген белгиле, плакатла къайда тюберге боллукъларын эм аланы  магъаналыкълары   бла шагъырейленнгендиле. Билимлерин сынар ючюн конкурсха бла викторинагъа да къатышхандыла.

Ахырында хар замандача, токчуланы энчи кийимлерин, экипировкаларын киерге, инструментлерин, оборудованияларын къолларында тутургъа  сюйгенле да кёп болгъандыла.