Инсанлагъа къырал себеплик этилликди

РФ-ни Къырал Думасы санкцияланы кезиуюнде инсанлагъа, регионлагъа эм бизнесге себеплик этер мурат бла законлагъа тюзетиулени къабыл кёргенди. Аланы къыралны правительствосу хазырлагъанды. Ол санда Бюджет кодексге тюзетиуле хазырланнгандыла, налог льготала тохташдырылгъандыла, къурулуш эм граждан авиациягъа болушлукъ мадарла да белгиленнгендиле.

Бюджет кодекс

Россейни бюджет сферасыны ышаннгылылыгъын сакълар,  регионлагъа болушлукъну игилендирир мурат бла РФ-ни бюджетден тышында къырал фондуна субвенцияла бериуню низамы тохташдырылгъанды. Законопроектде юч жангычылыкъ барды.

Ол санда 2023 жылда 1 январьдан субъектледе бла муниципал къуралыулада резерв фондну ёлчемине 3 процентлик чекле кетериледиле. Алай бла уа регионланы жашау магъаналы продуктлагъа, къурулуш материаллагъа багъала ёсгенлерин эслетмез ючюн резерв къураргъа онглары боллукъду. Андан сора да, бу мадар айлыкъны тёлерге, башха социал жумушланы заманында тамамларгъа   болушурукъду.

8-16 жыллары толгъан сабийле ёсген юйюрлеге ахча тёлеуню юсюнден РФ-ни президентини буйругъун толтуруу мадарла этиледиле. Россейни Пенсия фондуна регион бюджетледен субвенцияла тёлеуню низамы бюджет законлагъа кийириледи. Депутатла билдиргенлерича, ахча 5 миллиард сабийге берилликди.

Бюджет кредитлени жангыдан тергегенден сора аялгъан ахчаны регион проектлеге бериу жаны бла башламчылыкъ да этилгенди. Регионла бу ахчаны къаллай жумушлагъа къоратырыкъларын кеслери  сайларыкъдыла. 

 ЖКХ эм къурулуш

Депутатла къурулушну ышаннгылылыгъын жалчытыугъа бурулгъан законланы да къабыл кёргендиле. Ол санда документлени тинтиуню болжалын къысхартыргъа, объектни ишлетиуге эркинликни эсепге салыуну низамын женгиллетирге, жер участканы арендасына льгота берирге белгиленеди.

 Шахарлада къурулуш бардырыу жаны бла документлени хазырлагъанда, сёзге, жер-жерлени планларыны проектин, болжалла къысхартыллыкъдыла. Къурулуш бардырыргъа жерни бёлюуюню низамы къысхартыллыкъды, жууаплы органла арендаторлагъа льготала берирге эркин этилгендиле.

 ЖКХ-да реформала жаны бла фондну правлени финанс болушлукъну тохтатыуну  юсюнден оноуну чыгъаргъанда,  РФ-ни Правительствосуна аны толтурмазгъа боллукъ кезиулени эм болумланы тохташдырыу жаны бла полномочияла берилгендиле.

  Финанс ышаннгылылыкъ

Россейни финанс ышаннгылылыгъын сакълар мурат бла финанс рыноклада эм корпоратив болумлада  энчи низамла кийириледиле. Сёзге,  акциялары болгъан инсанлагъа акционер обществону оноулары, аны директорларыны советини ишлери бла байламлы документлени излерге эркинлик берген пакетни ёлчеми   1 процентден 5 процентге дери кёбейтиледи. Бу низам 2022 жылда 31 декабрьге дери кийирилликди.

Дагъыда страховой организаиялагъа Россейге къажау  тыш къыраллы организацияла бла келишимле къабыл кёрюрге чекле салыннгандыла. Россейли страховой компаниялагъа закон кючюне киргинчи къабыл кёрюлген келишимлеге кёре ахча тёлеуле бардырыргъа эркин этилмейди. Аны жаланда РФ-ни Ара банкы къойса, берирге боллукъду.

  Транспорт

Россейли компаниялада лизингде болгъан самолётланы эсепге салыргъа, алагъа учуу сертификатла берирге эркин этилгенди. Бу мадарла транспорт отрасльгъа къырал себепликни чеклеринде кийириледиле. Алай бла россейли авиакомпанияла тыш къыраллада чыгъарылгъан самолётланы паркын сакъларгъа, аланы регионланы араларында учууда хайырланыргъа боллукъдула. 

Андан сора да, россейли кемелеге кирирге чекле салыннган къыралладан кемелеге россейли портлада тохтаргъа жарамагъаны да кийирилгенди.

Налог  льготала

РФ-ни Налог кодексине тюрлениуле биринчи окъулууда къабыл кёрюлгендиле. Алай бла,  2021-2022 жыллада инсанла банкда тутхан ахчаларына жыйылгъан процентлеге подоходный налогну тёлемезге боллукъдула.  Транспорт налогну тёлеуню низамы да алышыннганды. Алгъын машинаны багъасы 3 миллиондан кёп болса, анга транспорт налог уллайгъан низам бла саналгъанды. Энди уа ол машинаны багъасы 10 миллиондан кёп болса тёленеди.

  Дарманла эм медицина керекле

Тыш къыраллы дарманланы Россейге келтириуню низамы да сюзюлгенди. Анга кёре   дарманны тышында жазыула орус тилде болургъа керекдиле. Бу мадар санкцияланы кезиуюнде инсанланы дарманла бла жалчытыуда чырмаула болмазына бурулупду.

 Медицина кереклени чыгъаргъан эмда аланы тыш къыралладан келтирген организациялагъа ишлерин власть органлагъа белгили этгенден сора, жыл бла жарымдан сора тохтатыргъа жарарыкъды.