Казбек Коков Россей Федерацияны регионларыны оноучуларыны жыйылыуларына къатышханды

Къабарты-Малкъар Республиканы Башчысы Казбек Коков Россей Федерацияны субъектлерини оноучуларыны жыйылыууну Советинде Къабарты-Малкъар тыш къыралла бла культура байламлыкъланы къалай жюрютгенини юсюнден доклад этгенди, деп билдиргендиле редакциягъа республиканы оноучусуну пресс-службасыны келечилери.

 «Озгъан жыллада биз тыш къыралла бла маданият байламлыкъланы айнытыу эм кенгертиу жаны бла иги кесек сынам жыйгъанбыз, дегенди республиканы оноучусу. Тыш къыралла бла  культура байламлыкъланы айнытыу-ол республиканы Россей Федерацияны халкъла аралы политикасын бардырыугъа къошумчулукъ этиу бла байламлы магъаналы бёлюмлеринден бириди».

 КъМР-ни Башчысы Казбек Коков Москвада Россейни тыш къыралла бла ишле министерствосуну «Федерацияны субъектлери тыш партнёрла бла маданият байламлыкъланы айнытыу» темагъа жораланнган жыйылыугъа къатышханды.   

 Тюбешиу Россей Федерацияны тыш къыралла бла ишле министри Сергей Лавровну башчылыгъында бардырылгъанды.

 Жыйылыугъа РФ-ни Экономиканы айнытыу министерствосуну,  Россотрудничествону келечилери эм бир ненча россейли регионну оноучулары  къатышхандыла.  

Россейни тыш къыралла бла ишле министри докладында былай айтханды: «Гуманитар байламлыкъла –бизни ишибизде магъаналы жерни аладыла. Ала тыш къыраллада инсан обществону арасында бир бирге ышаныулукъну, ангылаулукъну айнытыугъа эм тутаргъа уллу себеплик этедиле.   

Россейни маданият жаны бла уллу онглары барды. Ол онгланы тири хайырлана билирге керекди, нек дегенде бизни маданият  хазнабызгъа сурам битеу дунияда ёсе барады.  

Культура дипломатия – тыш къыралла бла бардыргъан политикабызны къыйматлылыгъын эм байлыгъын кёргюзтеди».   

«Россей- кёп халкълы эм кёп конфессиялы къыралды. Биз не заманда да бир жерде иги кесек саны болгъан миллетлени кёп ёмюрлени  мамырлыкъда жашап келген сейирлик сынамыбызны берирге хазырбыз»,-дегенди Сергей Лавров.  

 Жыйылыуда тыш къыраллы партнёрла бла халкъла аралы эм тыш экономика байламлыкъланы кючлерге кереклисини юсюнден соруула сюзюлгендиле, аны эсеплерине кёре, Россей Федерацияны субъектлерине жыйылыуда къабыл этилген оноула эм рекомендацияла жиберилликдиле.

Жыйылыугъа къатышханла маданият-гуманитар байламлыкъланы магъаналары ёсе баргъанын белгилегендиле, ала къыралны тыш политика сейирлерин жалчытыугъа эм аны керти сыфатын къураугъа ишлейдиле дегендиле.

 Кенгешде Россей Федерацияны субъектлери,  халкъла аралы майданлада кеслерини бай маданият хазналарын кёргюзтюп, Россейни культурасын андан да бай эм тюрсюнлю этгенлерин чертгендиле.  Советни келечилери регионланы тыш къыраллы партнёрла бла маданият байламлыкъланы айнытыуда халны тинтгендиле эм аланы айнытыргъа борчланы салгъандыла.

Тюбешиуге къатышханла быллай оюмгъа келгендиле, культура дипломатия шёндюгюлю информациялы амаллагъа таяныргъа керекди эм цифралы технологияланы да тири хайырланыргъа.

 Сергей Лавров   Федерацияны субъектлерини культура дипломатия бла байламлы башламчылыкъларыны магъаналылыкъларын белгилегенди. 

Къабарты-Малкъар Республиканы Башчысы жыйылыуда Къабарты-Малкъарны тыш къыраллы партнёрла бла маданият байламлыкъла къалай бардырылгъанларыны юсюнден айтханды.

«Бизни халкъла аралы культура байламлыкъланы айнытыуда эм тюрлю-тюрлю амалланы хайырланыуда иги сынамыбыз барды,- дегенди республиканы оноучусу. Тыш партнёрла бла маданият байламлыкъланы айнытыугъа эм  Россей къыралны шёндюгюлю халкъла аралы политикасын бардырыугъа республика  тири къатышады».

Регионну Башчысы жыйылыугъа къытышханлагъа республикада жууукъ эм узакъ тыш къыралладан да келип, халкъла аралы даражада культурада ишлегенлени тюрлю-тюрлю байрамлары   бардырылгъанларын айтханды.

Аланы санында белгилерча Юрий Темирканов атлы Халкъла аралы симфония макъамланы фестивалы, Халкъла аралы кинофестиваль эм    «Элбрусну башында тепсеуле» Халкъла аралы фольклор фестиваль. Ол байрамлагъа тохташдырылгъан тёрелеге кёре Европадан, Азиядан, Африкадан, Юг Америкадан къонакъла келиучюдюле.  Россейде, тыш къыраллада да белгили «Кабардинка» бла «Балкария» тепсеу къауумла  Европаны бла СНГ-ни къыралларында жетишимли концертле берип айланадыла.  

Казбек Коков 2020 жылда сентябрьде Къабарты-Малкъар Республика Беларусь Республика бла байламлыкъ тюхташдырыргъа келишим этгенин айтханды. Ол къырал бла быйылгъы жылда ноябрьде байламлыкъланы жюрютюу бла байламлы план къабыл этилгенди, ол санда маданият байламлыкъла да бардыла. Республиканы оноучусу бир ата журтлуларыбыз  бла- Сирияда, Иорданияда, Тюркде, Израильде эм Европа къыраллада жашагъанла бла культура байламлыкъла къалай жюрютюлгенлерини юсюнден айтханды. Сёз ючюн, 2021 жылда Тюркде, Иорданияда эм Германияда жашагъан бир ата журтлуларыбыз бла ана тилге бла орус тилге юйретиу компьютер амал  бла дерсле бардырылгъандыла.    

Бизни корр.