Республиканы социал-экономика айныууну эсеплери чыгъарылгъандыла, жангы борчла салыннгандыла

КъМР-ни Башчысы Казбек Коков Къабарты-Малкъарны Правительствосу бла кенгеш бардыргъанды. Анда республиканы социал-экономика айныууну быйылны 9 айына эсеплери чыгъарылгъандыла.

КъМР-ни Правительствосуну Председатели Мусукланы Алий билдиргеннге кёре, 2021 жылны январь-сентябрь айларында ташылгъан товарланы, тамамланнган ишлени бла жумушланы ёлчеми 38 миллиард сомгъа жетгенди, промышленный производствону индекси 88,2 процент болгъанды. Белгиленнген кёрюмдюледен артха къалыу эл мюлкде эсленеди. Аны сылтауу – хауа болумланы хатасындан тирлик жыйыу кеч башланнганындады.

Баш капиталгъа инвестицияланы ёлчеми ёсгенди, розница сатыу-алыуда да ол 13 процентге кётюрюлгенди. Ич эм тыш туризмде хакъ бла тамамланнган жумушладан быйылны 9 айына 6 миллиард сом тюшгенди. Ол а былтырны бу кезиуюнден 1,4 кереге асламды.

КъМР-ни финансла министри Елена Лисун билдиргеннге кёре, КъМР-ни бирикдирилген бюджетине январь-сентябрь айлада 38,8 миллиард сом тюшгенди, ол а планны 77 процентин тутады эмда былтырдан 6,7 процентге асламды. Налогладан эмда аладан тышында тюшген файдала да былтырны бу заманындан эсе 1,4 миллиард сомгъа аслам болгъандыла (113 процентге жетгенди). Битеу да бирикдирилген бюджетни кеси файдалары 34,3 процентни тутхандыла.

Къоранчлары 55 миллиард сом болурла деп белгиленнген эди да, 1 октябрьге 37 миллиард сомну, неда планны 67,5 процентин тутхандыла. Былтыр бла тенглешдиргенде 108 процент боладыла. Социал магъаналы эмда бек алгъа керек болгъан жумушлагъа къоранчла да битеу жоюмланы 74,4 процентин тутадыла.

Быйылны 1 октябрине бирикдирилген бюджетни къырал борчу 7,5 миллиард сом болгъанды. Анга этилген къоранчла 32,9 процентге азайгъандыла.

Казбек Коков правительствону къауумуну эсин бу шартха бургъанды: республика 2021 жылда къырал борчха къошарыкъ тюйюлдю. «Анга биз социал борчларыбызны азайтыу бла угъай, аяулукъну эмда кеси файдаларыбызны ёсдюрюуню хайыры бла жетерикбиз. Аны къой, къырал борчну бюджет кредитлени тюрлендириу бла къысхартыргъа кюреширикбиз, эпидемиология болумну хатасындан бизни къоранчларыбыз ёсгенлерине да къарамай», - деп чертгенди ол.