Предпринимательлени жарсыуларына энчи эс

Кёп болмай КъМР-ни прокуратурасында гитче эм орта бизнес бла байламлы  законнга бузукълукъ этилген шартлагъа оператив халда эс бурулурча   приём бардырылгъанды, деп билдириледи бизнес-обудсменни сайтында.

Аны РФ-ни Генпрокуратурасыны Шимал-Кавказ федерал округда  управлениясыны таматасыны орунбасары Александр Попов бла КъМР-де предпринимательлени эркинликлерин къоруулау  жаны бла уполномоченный Юрий Афасижев ётдюргендиле. Ол кюн эркинликлерин эмда закон бла белгиленнген  сейирлерин къорууларча  алагъа онтёрт предприниматель келгендиле.

Аланы асламысы къырал ветеринар жумушла ючюн  багъалагъа  иги да  кётюрлгенин,   терк-терк контроль-надзор  бардырып жунчутханларын,  эл мюлкге бёлюннген жерле бирде  бузукълукъсуз аукцион бла берилмегенлерин, жеринден тепдирилген сатыу-алыу объектлени хайырланыуну, налогла органла сылтаусуз  страховой тёлеулени ёлчемине къошханларын,  эл мюлк бёлюмде къармашханла къыйматлы  къырал программалагъа къатышыргъа   онг тапмагъанларын, бир-бирле конкуренцияны жорукъларын бузгъанларын, къырал бла бизнесни арасында тири  байламлыкъ жюрютюлмегенин   эмда башха проблемаланы белгилегенди. 

Александр Попов  тюбешиуде кётюрюлген вопрослагъа  тынгылы къараллыгъын,  законнга  бузукълукъ  этилгени ачыкъланса уа, жууапха тартыллыкъларын  да билдиргенди. 

- Генпрокуратураны келечиси къатышып  республикада предпринимательлеге  приём биринчи кере баргъанды.  Ол шарт предпринимательлени эркинликлерин къорууларча ишни игилендирирге ахшы себеплик этер деп бек ышанама, - дегенди Юрий Афасижев.