Жангылыкъла

Аш-азыкъ жаны бла къытлыкъ киргенини хатасындан Россейде ашаргъа жараргъа деп белгиленнген болжалы чыкъгъан  продуктланы юлеширге деп     оноу этгендиле. Аллай жалгъан хапарны украинлы телеграм-каналны тохтамагъанлай жайгъанлай турадыла, аны юсюнден войнасфейками.рф телеграм-канал билдиргенди. 

Быйыл Къабарты-Малкъарда  «Къоркъуусуз эм качестволу автомобиль жолла» миллет проектге «Эл жерлени комплекс халда айнытыу» къырал программагъа «Регион, район эм жер-жерли магъаналы  автомобиль жолланы айнытыугъа себеплик этиу»  федерал проектге кёре эм регионну жол фондундан бёлюннген ахчагъа     170 километр чакълы жол жангыртыллыкъды. 

Россельхознадзорну Шимал Кавказда регионла аралы бёлюмюню специалистлери ветеринария жаны бла «Меркурий» деген къырал системада информацияны сюзген кезиуде бизни республикада талай бузукълукъ тапхандыла. Сёз ючюн, Шегебахова А. А. энчи предпринимательни ол системада бёлюмюнде Шагебахов М. Х. деген биреу, анга эркинлиги да болмай, юйде этилген къаймакъгъа 172 электрон ветеринар документ жарашдыргъанды. Энтта да бир предприниматель (Шомахова А. С.) кесине продукция келгенини юсюнден билдирген 790 документни системада кёргюзтмей къойгъанды.

Кеслери алларына иш къурап къармашханланы онгдурур умутда КъМР-ни Экономиканы айнытыу министерствосу сынам халда онлайн-акция бардырып башлагъанды.

Эсигизде эсе, быйыл май айны алларында республиканы Башчысы Казбек Коков Нальчикде жангы поликлиниканы къурулушу башланнган жерде бетон къуюу ишлени башлаугъа къатышхан эди. Андан бери алайда ол жумушланы аслам кесеги тамам этилгенди. Къурулушчула ол объектни мурдорун жарашдырып бошай турадыла: тюбюн бетон къуюп кючлендиргендиле, аны юсюне блокла тизгендиле. Энди уа къабыргъаларын къалай турадыла эмда темир конструкцияларын жарашдырадыла.

Бу кюнледе Нальчикде   КВН-ни бийик лигасыны финал эришиую болгъанды. Анга Къабарты-Малкъар къырал университетни эмда Къабарты-Малкъар къырал аграр университетни, Нальчик шахарны жыйымдыкъ командалары къатышхандыла. Алагъа  Ставрополь крайны, Ингушетия Республиканы келечилери да  къошулгъандыла.
Оюн эки кесекден къуралгъанды: саламлашыу эмда оюнну аллында  жарау этиу. Командала асыры иги хазырланнгандан, жюриге сайлау этерге тынч тюйюл эди. Алай бла быйыл хорлам эки командагъа берилгенди: Нальчикни «Ингеборга Дапкунайте» эмда Ингушетияны «Хасан Халмурзаевну жыйымдыгъы».

МЧС-ни Къабарты-Малкъарда Баш управлениясында ведомствола аралы жыйылыуу болгъанды. Анда пилот сынауланы чегинде республикада къыйын болумну юсюнден билдириу  КОСПАС-САРСАТ радиомаяк системаны хайырланыуну юсюнден келишимге къол салыннганды, деп билдиредиле ведомствону пресс-службасындан.

«Кавказ. РФ» акционер общество август айны аллында ВДНХ-да ётерик «Путешествуй!» деген турист форумну бардырыугъа къатышырыкъды. Анда Россейде белгили турист ызланы онглары бла танышыудан сора да, жангыла бла танышдырыу да боллукъду. Глэмпинг, автотуризм, экотуризм  эм регионланы аш-суулары бла танышдырыу дегенча жангы онгланы юслеринден да толуракъ билир амал боллукъду. СКФО-ну регионлары уа анда кеслерини культураларын эм миллет азыкъларын да кёргюзтюрюкдюле.

Къабарты-Малкъарда «Качестволу эм къоркъуусуз автомобиль  жолла» миллет проектге кёре ишле къыстау барадыла. Аны чеклеринде  арт жыллада иги кесек  объектни игилендирирге онг табылгъанды.  Ол  экономиканы айнытыргъа себеплик этгенден сора да, регионну да  бетин кёргюзтеди.  Аслам  турист жокълагъан  республикагъа уа ол бютюн магъаналыды. 

2022 жылда Къабарты-Малкъарда туризмни айнытыу бла байламлы конкурсха 85 проект жиберилгенди.

Къараугъа битеу да 105 заявка келген эди, алагъа кёре 478 миллион сом изленнгенди. Эм кёп заявка Черек райондан (34) ийгендиле, Нальчикден, Элбрус эм Чегем районну предпринимательлери да тири болгъандыла. Юч заявка Прохладна райондан, Зольскдан да бири алыннганды, деп билдиреди республиканы Курортла эм туризм министерствосуну пресс-службасыны башчысы Ольга Погребняк.