Семиртгичлени себеплиги уллуду

Былтырны эсеплерине кёре, Къабарты – Малкъар Шимал - Кавказ федерал округда  сабанлыкълагъа  минерал семиртгичле салыу бла биринчи болуп,  къыралда беш алчы регионну санына киргенди.  Аны юсюнден бизге КъМР-ны Эл мюлк министерствосуну пресс-службасындан билдиргендиле.

 Къабарты-Малкъарны агрохимия службасында айтханларыча, республикада бир гектар сабанлыкъгъа 157 килограмм минерал  семиртгич салыннганды.  Бай эм качестволу тирлик алырча эм жер да кючюн тас этмезча аны болмагъанча  уллу себеплиги барды.

Быйыл кезиулю ишлени чеклеринде 46,7 минг тонна, неда былтыр бла тенглешдиргенде,  109 процентге кёп семиртгич къоратыллыкъды.  Ол санда жаз башы ишлени  бардырыргъа 67 минг тонна.  

 Къабарты-Малкъарны Правительствосу семиртгичле бла жалчытырыкъ дистрибьюторланы да тизмесин белгилегенди. Бюгюнлюкде ол  сегиз компаниядан къуралады.  Препаратла сылтаусуз эм  жетерча график бла  келтириледиле.  Бюгюнлюкде регион 25,5 минг тонна  къыстырыкъ этгенди.  Ол план бла  жаш башы кезиулю ишлеге къоратыллыкъны 38 процентин тутады.  

Арт  жыллада мюлкле иги урлукъну, минерал семиргичлени, энчи техниканы, мелиорацияны хайырланнганларыны, ол санда  сынамлы специалистлени иш кёллюлюклерини  себебинден   жыл сайын тёрели битимледен бай эм качестволу тирлик аладыла.

 Сёз ючюн, былтыр   мирзеу эм къудору ёсюмлюкледен 1,286 миллион тонна тирлик жыйылгъанды. Ол былтыр бла тенглешдиргенде, 107,8 процентге кёпдю. Аны бла бирге сагъынылгъан кезиуде нартюхден да биринчи кере  миллиондан аслам тонна жыйылгъанын  белгилерчады.