Къурулушну бла жашау журтла-коммунал мюлкню андан ары айнытыуну онгларын сюзгендиле

 КъМР-ни Башчысы Казбек Коков  Москвада РФ-ни Къырал советини Къурулуш, жашау журтла-коммунал мюлк, шахар болум жаны бла комиссиясыны, Регионланы айнытыу жаны бла правительстволу комиссияны президиумуну (штабыны) бла РФ-ни Къурулуш эмда ЖКХ министерствосуну  бирге бардырылгъан жыйылыуларына къатышханды. Кенгеш РФ-ни Правительствосуну Председателини орунбасары Марат Хуснуллинни башчылыгъында видеоконференция халда бардырылгъанды. Анга  дагъыда РФ-ни Президентини болушлукъчусу, Къырал советни секретары Игорь Левитин, РФ-ни къурулуш эмда ЖКХ министри Ирек Файзуллин, Къырал  советни комиссиясыны председатели Рустам Минниханов, толтуруучу властьны федерал органларыны келечилери, Россейни регионларыны башчылары да къатышхандыла.

 Кенгешни кезиуюнде РФ-ни Къурулуш эмда ЖКХ министерствосуну ишини эсеплери чыгъарылгъандыла. Къурулушну бла жашау журтла-коммунал мюлкню 2030 жылгъа дери айнытыуну стратегиясына, 2035 жылгъа дери тамамларгъа белгиленнген ишлеге энчи эс бурулгъанды. Игорь Левитин россейли юйюрлени жашау журтла бла байламлы болумларын игилендирирге деп Президент салгъан борчну социал магъанасы болгъанын эсгертгенди. Ол айтханыча, Къурулушну бла жашау журтла-коммунал мюлкню айнытыуну Россейни Правительствосу жарашдыргъан стратегиясында ма ол муратларыбызгъа жетиуню баш жоллары белгиленипдиле. Алагъа кёре бёлюмде бийик технология амалланы сингдирирге, конкуренцияны айнытыргъа, къудуретге тюшюрюлген заранны не къадар аз этерге белгиленеди.

Документде  экономиканы терк айныта барырча онгла къурау, шахарда къурулуш бардырыу эмда транспорт бла байламлы бирча болуру, промышленность тийрелени, эски, оюла тургъан юйле орналгъан жерлени кёчюрюу неда жангыртыу, шахарлада туризм арала къурау, транспорт эмда инженер инфраструктура объектлени жангыртыу да кёргюзтюледи, деп айтылгъанды жыйылыуда.

Къабарты-Малкъарда 2021 жылны эсеплерине кёре, жангы жашау журтланы саны аны аллында жылдан эсе 2,8 процентге ёсгенди. Битеу да  514 квадрат метрден асламы хайырланылыргъа берилгенди, кёп фатарлы 39 юй ишленнгенди.

Жашау журтланы къурулушларын бардырыуда инфраструктураны къурау уллу магъананы тутады. Нальчикде жангы микрорайонлада таза эмда кир суу ызла ишлеуге 2022-2024 жыллада федерал эмда регион бюджетледен миллиард сомдан артыкъ бёлюрге белгиленеди. «Шёндюгю шахар болумну къурау» къырал программагъа кёре уа 2024 жылгъа 216 жамауат тийрени бла 596 арбазны тапландырыргъа мурат этиледи.

Кенгешден сора Казбек Коков социал сетьде быйылгъа эмда келир жылгъа къурулуш бла байламлы планланы туура этгенди. «Быйыл Нальчикде сууну тазалаучу сооруженияланы проектлерин салып башларыкъбыз, Тырныауузда уа аллай проектлени жарашдырып бошарыкъбыз. Бахсанда къауум элге жетерик суу ызны ахырына жетдире турабыз, андан сора Элбрусда Азау талада канализация коллекторну жангыртыу ишле къолгъа алынырыкъдыла. Келир жыл а Зольск районда бир ненча элге жетерик суу ызны тартыргъа белгиленеди. Проектлени асламысы «Шимал-Кавказ федерал округну айнытыу» къырал программагъа кёре тамамланыллыкъдыла», -деп жазгъанды ол.