Эм иги предприятияланы белгилегендиле

Бюгюнлюкде Къабарты-Малкъарда кёп фатарлы жашау журтланы жумушларына  къарагъан 185 чакълы коммунал мюлк (ЖКХ) предприятие ишлейдиле.  Аладан «Россети Северный Кавказ» ток ючюн борч этмей,  болжалындан кеч къалмай тёлеген -  «Гарант», «Монолит»,  «Инициатива»,  «Наш Дом»,  «Комфорт» эм   «Лидер Сервис» биригиулени энчи белгилейди. Болсада бир къауум организацияны алыкъа   хайырланнган  электрокюч ючюн 99 миллион сом берликлери барды. 

Бирде ахчаны бир кесегин окъуна  алырча уллу кёллюлюк этген абонентлени  сюдге бермей  болмайды.  Алай бла  жыл башланнганлы  коммунал мюлк предприятие  6,2 миллион  сом багъасы ёнкючлерин  тёлерча сюд  164 ишни къабыл этгенди.  Дагъыда  алгъадан тёленмей тургъан борчланы эсге алсакъ, бусагъатда аланы 50 миллион сом тенгли берликлери барды. Андан сора да, бусагъатда сюд 25 миллион сом багъасына 177 ишге къарай турады.

Мындан арысында да, «Каббалкэнерго» биригиу уллу кёллюлюк этген борчлуланы къаты жууапха тартыр умутлуду. Ол санда   ёнкючлерин сюдню кючю бла жабарча онг излерикди.