Улутхачылыкъ бла кюрешде право билимни ёсдюрюрге

Къабарты-Малкъарны Жамауат палатасында республиканы жер-жерли самоуправление органларыны улутхачылыкъгъа къажау ишлери сюзюлгендиле.

Право сакълаучу эм контроль органла Басхан, Прохладна шахарланы, Черек районну жер-жерли администрацияларыны ишлерини юсюнден чыгъаргъан эсеплеге кёре республикада улутхачылыкъгъа къажау мадарла этиледиле. Бу ишлерин ала «Къабарты-Малкъар Республикада коррупцияны профилактикасыны юсюнден» 273-чю Федерал законнга, муниципал программалагъа эм право актлагъа тийишлиликде тамамлайдыла.

Хар муниципал къуралыуда норматив-право актла эм проектле законодательствогъа кёре энчи тинтиулени ётедиле. Самоуправление органлада къуллукъ этерге сюйгенле дайым юйрениулеге барадыла, законодательствода болгъан тюрлениуле эм жангычылыкъла бла шагъырейленнгенлей турадыла. Администрацияланы кеслеринде да профилактика халда семинарла, ушакъла, жыйылыула боладыла, суратланы, аудио эм видео роликлени эришиулери къураладыла, тематика буклетле жарашдырыладыла. Асламлы информация органла бла байламлыкъла жюрютюледиле, коррупциягъа къажау «исси» телефонну юсюнден жамауатха билдиргенлей турадыла. 

Алай кемчиликле да бардыла, ич ишле органлагъа аладан улутхачылыкъ шартла эсленнгендиле дегенча билдириуле келмейдиле. Болсада ишеклик туудургъан ышанла уа бардыла, ол санда контроль ишни тамамлауда, къырал заказ эм къырал программаланы чеклеринде бюджет ахчаны жоюуда, къырал эм муниципал мюлкню хайырланыуда да. КъМР-ни Прокуратурасыны улутхачылыкъгъа къажау законодательствону толутурууну эсеплеу жаны бла бёлюмюню прокурору Улбашланы Фатиманы айтханына кёре, къуллукъчуланы файдаларыны юсюнден эсеплени бермегенлерини сылтауу ала бу затха тийишлисича эс бёлмегенлери бла байламлыды, аны ючюн эсеплеу органладан данныйле кечигип келедиле. Чурумланы кёбюсю, МВД-ны КъМР-де коррупциягъа къажау бёлюмюню башчысыны орунбасары полицияны майору Рустам Абазов белгилегенича, адамланы право культуралары болмагъаны неда ала жангылыкъланы билмегенлери ючюн чыгъадыла. «Юлгюге, кёпле аукционлагъа неда жер-мюлк торглагъа къатышмагъанлай, алгъа заманладача, барып, энчи тюбешиуледе сёлеширге сюедиле. Ол себепден республикада жашагъанланы араларында право жарыкъландырыу ишни бардырыргъа, право сакълаучу, власть органланы бла общественниклени араларында байламлыкъланы кючлерге керекди. Андан тышында, улутхачылыкъгъа къажау ишни тирилтир ючюн, подзаконный актланы игилендирирге, муниципал къуллукъчуланы бу жаны бла билимлерин ёсдюрюрге керекди», - дегенди ол. Муниципал къуралыуланы келечилери кеслери да жер-жерли самоуправление органланы кадрла бла жалчытыуда проблемала бардыла. Сёз ючюн, билимли юристни тапхан тынч тюйюлдю.

Жыйылыуну эсеплерин чыгъара, палатаны жамауат къоркъуусузлукъ, законлукъну сакълау эм ОНК бла байламлыкъла жюрютюу жаны бла комиссиясыны башчысы Хачим Машуков, жамауат улутхачылыкъны дурус кёрмезча право жарыукъландырыу ишни тынгылы бардырыргъа кереклисин чертгенди. «Законну билмеу жууаплылыкъдан эркин этмейди. Ол себепден жаш, абадан адамла бла коррупцияны юсюнден тюзюнлей тюбешип сёлеширге неда асламлы информация органланы юслери бла билдиргенлей турургъа тийишлиди. Муниципал къуллукъчулагъа юйретиуле къураргъа, общественниклени улутхачылыкъгъа къажау ишге къатышдырыргъа кееркди», - деп белгилегенди ол.

Ахырында сейирлери болгъан органлагъа эсгертиуле жарашдырылгъандыла, деп билдиредиле Жамауат палатаны пресс-службасындан.