Пломбир: уумуду огъесе хайырлымыды?

Къышда, жайда да кёпле пломбирсизсиз болмайдыла. Ол саулукъгъа игимиди огъесе тюйюлмюдю? Аны юсюнден врач Жанатайланы Людмила айтады.

- Кертиси бла да, бизни республикада, башха жерледеча, мороженоени сюйгенле бек кёпдюле.  «СССР», «Золотой стандарт», «Семейное» «Айсберри», «Вкусландия», Nestle «48 копеек», «Чистая линия» эм башхала белгили брендледиле. Аланы кёп лабораториялада тинтгендиле: тинтилген юлгюле барысы да саулукъгъа къоркъуусузладыла (микробиология кёрюмдюлери барысыны да мардагъа келишеди). Башхача айтханда,  мороженое ууландырлыкъ тюйюлдю.

Алай бир-бир производительле этикеткаларында    ётюрюкню жазадыла. Эсигизде эсе, газетледе жазып тургъан эдиле, «Семейное» «Айсберри» деген мороженоени  этикеткасында айтылгъан затла керти тюйюлдюле , деп, россейли экспертле билдиргеннге кёре,  аны порциясыны тёртден  ючюсю битим жауладыла. Ма аллай затла басмада чыкъсала, производитель бирде башха тюрлю ишлеп башлайды.

Сары жауда болсун, мороженоеде болсун, ГОСТ деген сёзню окъусагъыз, ол игиди, бошуна жазып къоймагъан эсе товарны чыгъаргъан.

Нек хайырланадыла битим жаула бла? Къоранчланы азайтыр ючюн. Жаула пальма, кокос битимледен этиледиле. Ала хайырланылсала, производитель аланы этикеткада жазаргъа борчлуду. Аллай мороженоеде ол жау 50 процентден кёп болмазгъа керекди.

«Вкусландия», «48 копеек» эм швейцарлы Movenpick атлары болгъан мороженоелени  бир тапсыз энчиликлери барды. Алада бал туз упаковкаларында кёргюзтюлгенден эсе иги да кёп болады, дейдиле россейли экспертле.

Мороженоени кёбюсю къургъакъ сютден этиледи.  Керти сют    «Чистая линия» деген мороженоеде барды. Алай бусагъатда Нальчик шахарда тюз кесигиз къарап тургъанлай да этедиле аны, кесибизни сютюбюзден. Андан игиси жокъду.