Кёзлерин жарытхандыла, кёллерин кётюргендиле

Нальчикге Донецк областьны Макеевка шахарындан отуз беш къызчыкъ бла жашчыкъ келгендиле. Аланы жыл санлары жетиден онжетиге дериди. Барысы да Долинскде «Радуга» социал реабилитация арада тохтагъандыла Алагъа бизде къонакъбайлыкъ шахарны администрациясы бла этилген келишимге кёре къуралады. Уруш къазауаты баргъан жерден келген сабийлеге, саулукъларын кючлендиргенден сора да, тюрлю-тюрлю оюнла, республиканы айбат жерлерине жолоучулукъла да къураллыкъдыла.

Аланы, биринчи болуп, Къабарты-Малкъарны тиширыуларыны советини къауумуну таматалары Аулиат Каскулованы башчылыгъында жокълагъандыла. Ала татлы ашарыкъла, илляула,  Нальчикни, республиканы айбат жерлерини суратларыны жыйымдыгъын да элтгендиле.

– Хош келигиз, багъалы къонакъла, бизни республикада сиз тынч-ырахат турургъа боллукъсуз. Сизни быллай заманыгъызда къыйынлыкъ сынагъаныгъызгъа бек жарсыйбыз. Бизни Президентибиз Владимир Путин ёсюп келген тёлюлеге иги болурун излейди. Ма бизни республикада да кёп миллетлени келечилери къарындашла, эгечлеча бир бирни ангылап, бир бирге билеклик эте жашайбыз. Ма бюгюн да сизни жокълай оруслула, къабартылыла, таулула да келгендиле. Барыбызны да атыбыздан сизге монглукъ, саулукъ, тынчлыкъ, мамырлыкъ тежейме, – дегенди Аулиат Фуадовна.

КъМР-ни Парламентинде бир талай жылны депутат болуп тургъан Фатимат Гешева уа къонакъла мында тургъан кюнлери эслеринде къалырча этиллигине ишексиз болгъанын айтханды. «Алгъаракъда сизден келген ансамбль мында тепсегенди, биз алагъа бек жарыкъ тюбеген эдик. Сизге да къолубуздан келген игиликлени аярыкъ тюйюлбюз», – дегенди ол.

Жазыучу, журналист эмда китапла чыгъарыучу Мария Котлярова уа бюгюн бизни республикагъа къонакъгъа келген сабийле, бу жерлени асыры жаратхандан, талай жылдан бери дагъыда къайтыргъа сюериклерине ийнаннганын билдиргенди. «Биз, сизни аппаларыгъыз, ынналарыгъыз да Совет Союз деген бир уллу къыралда жашагъанбыз. Бир бирге къонакъгъа баргъанбыз. Анда мындан кёплени танышлары, шуёхлары, ол угъай да, къарындашлары, эгечлери да жашайдыла. Мындан ары да ол ниет бла жашарыгъыбызгъа ийнанама. Келир заман сизни къолугъуздады. Сизсиз аны бютюн ариу, бютюн тынчлыкълы, бютюн жарыкъ этерикле да. Ахшы муратларыгъыз толсунла!», – дегенди ол.

Къонакъ сабийлени биргелерине келген юйретиучю Евгения Захарова республиканы оноучуларына, тиширыу советни къауумуна да жюрек ыразылыгъын айтханды. «Биз тюнене келгенбиз, бюгюн а сиз саугъала бла жокълайсыз бизни. Бир такъыйкъагъа да ишегим жокъду бизни барыбызгъа да мында иги да, тап да боллугъуна. Бизни борчубуз – бу сабийлени Макеевкадан сау-саламат чыгъарып, бери жетдирирге эди да, алай эталгъаныбызгъа къууанабыз», – дегенди ол.

Евгения Захарова сабийлени элгеннгенлери алыкъа кетмегенин да айтып, быллай юлгю келтиргенди: самолётну учуп баргъанын кёрюп, жашчыкъладан бири, къатыма чабып келип, кёзчюклерин сыйпай: «Бу а бизге окъла, топла атармы?» - деп соргъанды. Бусагъатда ала хар уллу тауушха да къалтырайдыла. Бир кесекден унутурла, жюреклери хош болур деп ышанама. Бизге айтханларына кёре, мында уста врачла, психологла, башха специалистле да ишлейдиле. Шёндю аланы болушлукълары къызчыкъларыбызгъа бла жашчыкъларыбызгъа бек керекдиле», – деп къошханды ол.

Ахырында къонакъла, къонакъбайла да бирге суратха тюшгендиле.