Жолланы андан ары игилендириуню амалларын сюзгендиле

 КъМР-ни Башчысы  Казбек Коков Москвагъа иш бла баргъан кезиуде Россей Федерацияны транспорт министрини биринчи орунбасары Андрей Костюк бла тюбешгенди. Ала «Къоркъуусуз эм тынгылы жолла» миллет проект Къабарты-Малкъарда къалай толтурулгъанына къарагъандыла эмда жолланы андан ары игилендириуню амалларын сюзгендиле.

Арт жыллада жолла бла байламлы ишле къыстау баргъанлары белгиленнгенди. Республиканы жол мюлкюню предприятиялары производство онгларын игилендиргендиле, къошакъ ишчи жерле да ачхандыла. 2020-2021 жыллада федерал, регион эмда муниципал магъаналы жолланы 500 километри чакълы бири изленнген мардалагъа келиширча этилгендиле. Жолда жюрюуню къоркъуусузлугъун кючлеу жаны бла да талай иш бардырылгъанды. Жаланда регион жоллада окъуна 100-ден артыкъ километрде чыракълары бла чыпынла орнатылгъандыла. Жолдан ётерча 400 чакълы бир ыз жангы миллет стандартлагъа кёре тапландырылгъандыла.

«Кавказ» Р-217 федерал жолну битеу узунуна тёрт ызгъа дери кенгертиу жол къурулушда бек магъаналы ишледен бирине саналады. 2022-2024 жыллада автомобиль жолладан 27,8 километрин хайырланыргъа берирге белгиленеди. Быйыл а Лескен сууда, Куба-Табада бла Экинчи Чегемде юч кёпюр тапландырыллыкъдыла эмда кенгертилликдиле.

 Регионда «Къоркъуусуз эм тынгылы жолла» миллет проектге кёре быйыл тамамланыллыкъ ишлени планына кирген объектле бла байламлы келишимле этилинип бошалгъандыла.

 Жол ишлени программасына, ол санда миллет проектге эмда башха къырал программалагъа кёре, битеу да автомобиль жолланы 170 километри чакълы бири изленнген мардалагъа келиширча этилликди. Ол санда Нальчикни баш магъаналы жоллары – Ленин, Къулийланы Къайсын,  Шогенцуков проспектле бла Къабарты орам - жангыртыллыкъдыла. 40 километрден аслам жолну узунуна уа чыракълары бла чыпынла орнатыргъа мурат этиледи.

Планнга кирген битеу ишлени  болжалдан алгъа тамамларгъа белгиленеди. Быйылны биринчи жарымында окъуна аланы 80 процентинден асламысы тамам этилликди.

КъМР-ни Башчысы республиканы жол мюлкюню  жолла бла байламлы ишлени иги кесегин толтурургъа къолундан келлигине ишексиз болгъанын билдиргенди. Ушакъны кезиуюнде республикагъа жолла бла байламлы жангы проектлени толтурургъа ахча болушлукъ этиуню онглары сюзюлгендиле. Сёз кёп къоранчла излеген  регион  автомобиль жолланы, дагъыда республиканы ара шахарыны баш орамларын бла жолларын тохташдырылгъан мардалагъа келиширча этиуню юслеринден да баргъанды.