Казбек Коков Нальчикни жолларында баргъан къурулушлагъа къарагъанды

Казбек Коков Нальчикде жол-къурулуш эм тапландырыу ишле къалай баргъанларына къарагъанды. Республиканы оноучусу кесини телеграмм-каналында Къабарты-Малкъаргъа 100-жыл болгъаны бла байламлы байрамгъа хазырланыу уллу ишлени юсюнден айтханды, деп билдиргендиле республиканы оноучусуну пресс-службасындан.

 «Бюгюн шахар округну транспорт аслам жюрюген тёрт уллу орамларына къарагъанма,  шёндю алада комплексли жол ишле бардырыла турадыла. Къурулушчула Ленин, Шогенцуков, Кулиев атлы проспектледе эм Кабардинская орамда къыстау кюрешедиле. Март айда хауа болумла къурулуш ишлени тамамларгъа аламат болмагъанлары себепли, ала бир кесекге акъыртын бардырылгъандыла. Энди жолчула тохташдырылгъан мардадан чыкъмазгъа таукелдиле. Шёндю белгиленнген объектледе 80 энчи техника бла 160 ишчи урунады»,- деп жазгъанды Казбек Коков.

 Республиканы оноучусу белгилегеннге кёре, ремонт ишле бардырыла тургъан жолланы жанларында иги кесек социал магъанасы болгъан учрежденияла турадыла, ол себепден, аланы тёгереклерин тапландырыу шахарчылагъа эм Нальчикге солургъа келгенлеге ол уллу магъананы тутады.

 «Жоллада асфальтны алышындыргъандан сора да, жангы чыракъла жанарыкъдыла, автобусла тохтаучу эм машиналаны салыучу жерле жангыдан ишленирикдиле, «жашил зонала», тротуарла жангыртыллыкъдыла. «Таза кёк» программа бла эски инженер коммуникацияла  алышынырыкъдыла, ала жер тюбю бла барлыкъдыла. Жолланы юслерин жапханда кёп жылланы хайырланырча, качествосу тынгылы болгъан, зыгъыр- мастика къатыш асфальтобетон салынырыкъды», -дегенди республиканы оноучусу.

«Беш километр узунлугъу болгъан Ленин атлы проспектни адамла жюрюген жерлери тапландырыллыкъды. Жолну эки жанында   адамланы аякълары учмазча тынгылы плитка салынырыкъды  эм жангы, декоратив   халда ишленнген  чыракъла орнатыллыкъдыла. Кулиев атлы проспектде суу баргъан быргъыла алышындырыллыкъдыла, тротуарла тапландырыллыкъдыла, жангы бордюрланы саллыкъдыла. Шогенцуков атлы проспектде да иш кёпдю. Мында инженер коммуникацияланы, ол санда суу баргъан эм канализация быргъыланы алышып бошай турабыз. Бу орамда жангыдан юч къаты асфальт салынырыкъды, бордюрла, жангы чыракъла орнатыллыкъдыла, жамауат транспорт тохтагъан комплексле, тротуарла, машина тохтаучу жерле шёндюгю излемлеге келиширикдиле», - деп айтылады билдириуде.

 «Идарова бла Кабардинская орамла бирге къошулгъан жерден тебиреп Нальчикден чыкъгъынчы 4,6 километр узунлукъда машинала аслам жюрюйдюле. Энди ол участокда жолну кенглигинн 15 метрге жетдирликбиз, ортасын бёлюп, алайда «жашил зона» боллукъду.

 Автомашинала аслам жюрюген башха жерлеге да къарагъанбыз. Ашурова  орам бла Майский жанына баргъан жолда къошакъ полоса этилликди. Нальчикден чыкъгъан жерде светофорланы орунуна, машинала тёгерек халда жюрюген комплекс ишленирикди. Алай бла Мовсисян орамгъа тыйгъычсыз чыгъаргъа онг боллукъду. Объектни къурулушун белгиленнген мардадан алгъа бошаргъа мурат барды», - дегенди Казбек Коков.

Къабарты-Малкъарны Башчысы Нальчикни баш орамларын тапландыргъандан сора да, дагъыда жети жангы скверге ремонт этиллигин айтханды. «Ала аэропорт къатында Юрий Гагарин атлы, Къабарты-Малкъар къырал университетни тийресинде, Курортный сквер, Ленина бла Тарчокова орамла бирге къошулгъан жерде эм «Нарт» микрорайонда Амшокова  ормадагъы сквер.

«Шёндю Нальчикде бардырыла тургъан ишле регионубузну ара шахарын тапландырыргъа бла игилендирирге бурулупдула, адамлагъа жашау этерге тынч болсун деп этиледиле ол затла. Бу жаны бла ишле республиканы битеу районларында бла шахарларында бардырыллыкъдыла», - деп чертгенди Казбек Коков.

Бизни корр.