«Бир-бир тиширыуланы аналыкъ сезимге жюреклери кеч ачылады»

Отуз жылдан сора аналыкъны насыбын сынагъанла кёпден кёп болуп барадыла. Бийик билим алыргъа, иш табаргъа, анда бираз кеслерин сынаргъа сюйгенле юйюр къурау сагъышха киргинчи, заман озуп кетеди. Кечикген аналыкъ-ол неди, уллу насыпмыды, неда анагъа эм сабийчикге уллу къоркъуумуду?  Аны юсюнден  врач – гинеколог Шауаланы Венера айтады.

- Жыл саны  отуздан озгъан тиширыу,  гинекологну кёз къарамына кёре, жашмыды?

- Шёндюгю дунияда жашау мардала тюрленип барадыла, ол санда медицинада да. Бир – бирле жыйырма жылларында да ичлеринде аурумагъан затлары жокъду, башхала уа элли – жетмиш жылларында кийик саулукълуладыла. Хау, тиширыугъа 35 жылы толгъан эсе, сабий табыуну къоркъуулугъу бютюнда уллу болады.  Битеу алып айтханда, былай дерге боллукъду - уллайгъан тиширыуланы сабийлери кезиулеринден алгъа кетиулери кёбюрек тюбейдиле. Ол тиширыуланы эски ауруулары терк-терк къозгъаладыла.

Кечикген аналыкъны ахшы белгилерине аллай ананы чархыны жашнауун, климакс тюрлениуюню артха созулгъанын да санаргъа керекбиз. Анда остеопороз, инсульт ауруула да азаядыла, къанында холестеринни мардасы тутхучлу ёлчемде турады.

Къалай-алай болса да, тиширыугъа 35-ден атласа, ол сабий табаргъа кёлленсе, борчлу халда диспансеризациядан ётерге: терапевт, кардиолог, эндокринолог, уролог, окулист,  оториноларинголог, стоматолог, флеболог, генетик бла тюбеширге керекди. Врач бла сабийни табаргъа жарарыгъыны бла жарамазлыгъыны, дарманланы  мардаларыны, кесинде къаллай эски ауруула болгъанларыны  юслеринден ушакъ этилсе да игиди.

-Жыл санлары уллуракъ болгъан тиширыуланы асламысы аламат анала болгъанлары баямды.

- Хау, отуз беш-къыркъ жыллары толгъандан сора сабий табаргъа кёлленнген тиширыуланы бийик билимлери, профессионал усталыкълары да боладыла, ырысхы жаны бла, жалынчакъсызладыла. Ала кеслерини сайлауларына бек жууаплы къарайдыла. Уллайгъан атала эм анала энди ата-анала боллукълагъа деп ачылгъан курслагъа тири къатышадыла. Алагъа туууллукъ сабий ата-аналаны кеслерини саулукъларына жууаплы къараргъа итиндиреди, ала, сабийлерин ёсдюрюр эм юйретир ючюн, къолдан келген мадарланы этедиле.

Кечикген аналыкъ тынгылы сагъыш этилип болгъан ишди. Ол себепден сабийни ёсдюрюу ата-анагъа бек уллу магъаналы, тынгылы тамамланылыргъа керекли борчду.

Эрттеден бери сакъланнган сабийле бек багъалыладыла, ийнакъдыла, ата-аналары аланы хар зат бла да жалчытыргъа сюедиле. Тиширыу сабийни отуз жылдан сора табаргъа кёлленнген эсе, аны юйюрю не жаны бла да анга билеклик этерге керекди.

- Баям, битеу дунияда да кечикген аналыкъ кёпден кёп тюбей болур?

- Хау, бусагъатда дунияда атлары айтылгъан актрисала, алим тиширыула, суратчыла элли жылларында окъуна сабий табадыла. Башында айтханымча, мардала тюрленип барадыла. Алгъынча бир ыз жокъду. Бирле, жаш болгъанлыкъгъа, кеслерини саулукъларына сакъ болмагъанла, бек саусуз  сабий табадыла, башхала уа къыркъ жылларында да саулукълу баланы аналары болуп къаладыла.  Кечикген аналыкъ да насыпха эшик болгъанын кёп кере кёргенбиз. Билемисиз, бир – бирде тиширыуланы  аналыкъ сезимге  жюреклери кеч ачылады. Ол кезиу келсе, ишлерин да бир кесек заманнга къоюп, жашауларын толусунлай тюрлендиредиле.