Кесинги толусунлай насыплыгъа санар ючюн, бюгюннгю жашауда не зат керекди?

Бу соруугъа кёпле кёп тюрлю жууапла бередиле. ВЦИОМ-ну сорууларына берилген жууаплагъа кёре, Россейде  жашагъанланы 37 проценти насыпларын юйюрлери бла ырахат жашауларында кёредиле, 18 процентини къууанчлары уа -   сабийлери, туудукъларыдыла, 12 проценти жууукълары бла ахлулары сау-салам турсала кеслерин насыплыгъа санайдыла, 11 проценти ишлеринде бла окъууларында табадыла жюрек ырахатлыкъ, 6 проценти сюймекликде насыплыдыла, дагъыда 6 проценти жашауларында хар зат да тап болгъаннга санайды, 4 процепнти юйюр ырахатлыкълары бла ёхтемленедиле, 3 проценти шуёхлары билеклик этгенлерине къууанадыла, дагъыда 3 проценти юйлю болгъанлары бла насыплыдыла.

Алай  «Сиз кесигизни насыплыгъа санаймысыз?» деген сорууну бардыргъан специалистле оюм этгеннге кёре, адам насыплы болур ючюн алай кёп зат да керек тюйюлдю. Анга ма бу шартла да шагъатдыла. 

Бизни не зат къууандырады?

Ахча

Тюзюн айтханда уа, аны санагъан. Башха тюйюлдю, кесингикиленими неда башхаланыкъынмы санайсыз. Бир-бир алимле къауум адамны былай сынагъандыла: бирлерине ахчаланы шыбырдатхандыла, башхаларына уа – бош къагъытланы. Биринчилени кёллери иги да кётюрюлгенди, экинчилери уа – арталлыда тюрленмегендиле.

Жолоучулукъ

Кезиуден кезиуге бир жангы жерлеге бара турургъа керекди насыплылыкъны сезер ючюн эмда жашауну татыуун ангылар ючюн. Сиз юйренчек болуп къалгъан тёгерек-башны бираз заманнга окъуна алышындырсагъыз, кёлюгюз башха тюрлю болады.

Къучакълашыу

Алимлени оюмларына кёре, адам жууукъ-ахлуну, сюйгенин къучакъласа, насыпны гормонлары ишлеп башлайдыла. Анга ийнанырчады. Сёз ючюн, бюгюнлюкде пандемияны хатасындан адамла бир бирлерин къучакълаялмайдыла, сюйген адамларын жокълаялмайдыла. Аны себепли бизни арабызда мудахла, нервалары къозгъалгъанла, женгил ачыуланнганла кёпден кёп тюбеп барадыла.

Шуёхла

Бек аздан он нёгери болгъан адамны насып сезими шуёхлары андан аз болгъандан эсе кючлюдю. Алимле тергегеннге кёре, беш неда андан азыракъ шуёху болгъанладан жаланда къыркъ проценти кеслерини насыплыгъа санайдыла. 5-10 жёнгери болгъанладан а элли проценти насыплыма дейди. Жашауубузгъа ыразыбыз дегенлени араларында уа шуёхлары ондан кёп болгъанла аслам болуп чыкъгъандыла.

Эрттен азыкъ

Эрттенликде къуймакъ ашагъанланы кёллери жарыкъды. Нек дегенде, жумуртхалада адамны кёлюн кётюрген затла бардыла. Толу насыплы болур ючюн эки жумуртха да тамамды. Къуймакъны ингирликде ашагъандан эсе, эрттенликде ашагъан файдалыды.

Бизни кёлюбюзню чёкдюрген неди?

Терк хазырланнган аш бла татлы затла

Хар кюн ашагъан азыгъыгъызда терк хазырланнган ашла аслам эселе, мудахлыкъ сизни бийлегенлей турлукъду, дейдиле алимле. Фаст фудланы аслам ашагъанлада депрессия къозгъалыргъа къоркъуу уллуду. Врачла аны къуруда эсгертгенлей турадыла.

 Алтын

Канаданы алимлери тохташдыргъаннга кёре, алтын затла адамны терисине ышылып турсала, аны нервалары къозгъалыргъа боллукъдула. Сёз ючюн, аллай адамны кёлю чёгеди, тынгысызлыкъ бийлейди. Специалистле алтынны ахыры бла да жюрютмегиз демейдиле, алай аланы кече тешип жатсагъыз иги боллукъду дейдиле.

 Интернет

Соцсетьлени къозгъап, нёгерлеригизни, башхаланы да кёрюп турсагъыз, жашауугъуз башхаладан эсе татыусуз кёрюнюп къаллыкъды. Алай эте кетсегиз, кесигизни, жёнгерлеригизни да кёрюп болмай тохтарыкъсыз, депрессия башланырыкъды.

Тютюнле

Хар ичилген тютюн адамны тынчлыгъын бузады. Аны тынгысызлыкъ бийлейди, ол терк ачыуланып къалады, ахырында депрессиядан ауруйду. Британияны алимлери 40 жыллары толгъан 6,5 минг адамны къатышыуу бла тинтиуле бардыргъандыла да, ахыр шартла аланы къууандырмагъандыла: тютюн ичгенлени 19 процентинде депрессия эмда тынгысызлыкъ ачыкъланнганды. Тютюн тартмагъанланы араларында уа аллайла жаланда он процентинде тюбейдиле.

Къымылдамауну хатасы

Австралияны алимлери уа кёп заманны олтуруп ишлегенлени саулукъларын тинтгендиле эмда быллай оюмгъа келгендиле: олтуруп турууну излеген ишде уруннган тиширыула бютюн бек апчыйдыла, жюреклери аз затха да къыйналып тебирейди, кёллери чёкгенлей турады.

Текуланы Хауа хазырлагъанды.