Усталыгъы, иш кёллюлюгю, жарашыулулугъу бла сюйдюргенди кесин

Черек районну больницасында атларын махтап  айтырча   врачла, хирургла, медсестрала да кёпдюле. Аланы  адамлыкъларыны, саусузгъа  сакълыкъларыны юсюнден дайым эшитгенлей турабыз.  Захридин Шариповну юсюнден  жазарымы да бу ауузну эллеринде жашагъан бир  ненча адам тилегенди.
        
 Ол Къабарты-Малкъаргъа Таджикистандан 1992 жылда урушдан къачып  кёчгенди. Эки жылны ичинде республикалы клиника больницада хирург болуп ишлегенден сора, аны Къашхатаугъа  чакъырадыла. Анда ол хирургия бёлюмге былтыр жайгъа дери башчылыкъ этип тургъанды. Алай бусагъатдагъы экономика  къытлыкъ бла байламлы  бёлюмлени таматаларыны къуллукъларын кетергендиле да,   таджикли къарындашыбыз  тамата хирургну къуллугъун бардырады.

Анга алгъа мында сууукъ тюбеген эдиле, алай аны усталыгъын, адамлыгъын кёргенден сора, кёз къарамлары тюрленнгенди. Акъыллы сёзю, усталыгъы, иш кёллюлюгю, жарашыулулугъу  бла ол кесин сюйдюреди. «Къолу женгилден, усталыгъы уллудан анабыз Зухураны ёлюмден къутхаргъанды. Биз аны игилигин бир заманда да унутурукъ тюйюлбюз. Бек  сау болсун!»,- дегенди  менден аны юсюнден жаз деп тилегенледен бири Азаматланы  Мадина. Аллай ыразылыкъланы санын а санап чыкъгъан окъуна къыйынды.

Къабарты-Малкъаргъа кёчгюнчю  Захридин Душанбеде он жыл хирург болуп ишлегенди. Институтдан окъуна аны хунерлигин, къармашыуун кёрюп, тёгерегине жыйылгъанла, ишлеген амалына къарап  юлгю алгъанла кёп болгъандыла.  Ол  кеси да  медицина китапланы, журналланы окъуп, Интернетге да терк-терк кирип, билимин, усталыгъын да ёсдюргенди,  алгъа биринчи, артда уа бийик  категориялы хирург деген атха да  тийишли болгъанды. Аны бла бирге уа   илму иши бла байламлы тинтиулени да бардыргъанды, аны да жазып бошай турады.

Юй бийчеси  къабартылы къызды. Алай ол аны бла  Душанбеде тюбешген эди. "Совет Союзну заманында  бийик эм энчи окъуу юйню бошагъанланы ары-бери ишлерге  жибергендиле. Мадина уа бизни шахаргъа тюшюп, санэпидстанцияда урунуп башлайды. Ма ол кезиуде танышханбыз, сора   бир юйюр  къурагъанбыз. Бир къызыбыз барды - Тахмина.  Ол бусагъатда Шимал  Осетия-Аланияны  къырал медицина университетини бешинчи курсуну студентиди. Аны бошап келсе, тишлеге бакъгъан врач боллукъду. Аны туугъан жери Къабарты-Малкъарды",-деп ёхтемлик бла айтады ата.

Захридинни Таджикистанда беш эгечи бла  эки къарындашы жашайдыла. Анда башха  жууукълары, ахлулары да кёпдюле. Биринчи заманлада  бек тансыкъ болуп тургъанды. Ол атасын, анасын да къоюп кетген эди бери. Алай, ай сайын алагъа ахча жиберип тургъанды. Бюгюнлюкде да, къарындашларын, эгечлерин да  унутмай, терк-терк телефон бла сёлешип, хапар билип турады. Насыпха, Интернет, скайп да бардыла.  

-Мени мында абаданла иги ангылайдыла,- дейди хирург,- ала кёчгюнчюлюкню кёргендиле, сюргюнню къыйынлыгъын кеси башларында сынагъандыла. Мен да алагъа ушайма. Туугъан жеримден, жууукъларымдан кенгде жашаргъа манга адамланы сюймекликлери эм жаратхан ишим бек болушадыла. Кюч да, къарыу да бередиле. Андан сора да, бу жерлени бек жаратама. Айтхылыкъ Къайсынны сёзлерин эсиме тюшюреме терк-терк:
                 Жюрегим мудах болса,
                 Мен Малкъаргъа барама.
                 Нек бараса деп сорсанг,
                 Анда тынчлыкъ табама!

Захридин ишине бек жууаплы къарайды. Кесин аямайды, саусузларын кёпге къоюп  кеталмайды. Не  заманда да ишчи жериндеди.

- Жети жыл болады мен Душанбеге баралмай тургъанлы. Саусузларымы къоюп кетерге кёзюм къыймайды. Бири аягъы юсюне болгъунчу, экинчисине къараргъа тюшеди. Заман а терк кетип барады. Быйыл, Аллах айтса, бир беш-алты кюннге окъуна жетип келирме  деген акъылдама,-дейди.

Биринчи  заманлада аны  сатыу-алыу  бла кюрешсенг  хайырлыды деп да терилтирге кюрешгендиле. Ол заманда кёпле аны бла  башларын кечиндиргендиле. Алай ол не заманда да саусузлагъа  багъаргъа  сюйгенди  да, андан  таймагъанды.

Сёзсюз, тынч тюйюл эди танымагъан халкъны ичинде тилни, адетни да  билмегенлей  жашау  къурап, ишлеп башларгъа.  Алай Захридин мугурайып къалмагъанды, тюнгюлмегенди, къаты ишлеп, жашау этерге, юйюр тутаргъа кюрешгенди.  Къатында адам къыйналгъанын кёрсе, анга болушлукъгъа келирден  бир заманда да артха турмагъанды. Аны бла киши жеринде да намыс-сый тапханды. Ол малкъар, къабарты тилледе сёлешеди, къызларын да  мында жюрюген  адетлеге юйретгенди.