Прививкагъа къажау турургъа керекмиди?

Адамны кесине неда аны сабийине прививка этерге кереклисини юсюнден даулашла не заманда да тохтамайдыла. Алай кёпжыллыкъ сынаула бла статистика шартла профилактика халда дарман салыргъа кереклисин шарт белгилейдиле. Бу амал адамгъа не береди, аны къаллай къоркъууладан сакълайды - аланы юсюнден бизге Роспотребнадзорну КъМР-де управлениясыны специалист-эксперти Татьяна Луцкая айтханды.

- Коклюш, дифтерия, кёме аурууладан къыйналгъан неда полиомиелитни хатасындан сакъат болуп къалгъан сабийни кеси кёзю бла кёрген ата-анала бу амалны (вакцинация) хайырлыгъына бир да ишек болмаз эдиле. Бюгюнлюкде кёп ауруулагъа къажау вакцинала бардыла. Алай, жарсыугъа, прививкала этерге сюймегенлеге тюберге да боллукъду. Быллай терс акъыллылыкъ жукъгъан аурууланы жайылыууна осал жаны бла себеплик этеди.

Иммунизация (вакцинаны прививкасы) жаланда ол къоркъуулу аурууланы болдурмаз умут бла этилгенин ангыларгъа керекди. Ала шёндю толусунлай къурутулгъандыла деп айтырча тюйюлдю. Алай бир-бирлерин а, сёз ючюн, чечекни, жаланда дарман салыу бла къурутургъа онг табылгъанды.

Быллай прививкалары болмагъанлагъа стационарлада плановый операцияланы этерге жарамайды. Аллай сабийлени солуу учреждениялагъа да алмайдыла. Вакцинациягъа угъай дерни аллында, аны хатасындан сизни  сабийигизде къайсы ауруугъа иммунитети болмазлыгъыны юсюнден иги сагъыш этигиз. Сабийни, аны тёгерегиндегилени саулукъларына, жашауларына къоркъуу тюшгенин да билирге керекдиле ата-анала. Халкъны эм азы бла 95 проценти ётсе вакцинацияны, эпидемиология жаны бла болум ол заманда саналады игиге. Сёз ючюн, кёмеден ауругъанланы саны бизни республикада, башха регионлада да кёбейе баргъаны ма быллай прививка этилмегени бла байламлыды.

Кёп болмай Чеченде полиомиелитден ауругъан биреулен ачыкъланнганды. Быйыл июнь айда уа Украинада эки адамда табылгъанды ол. Шёндюгю дунияда, тюрлю-тюрлю сылтаула бла кёпле башха жерлеге кёчюп баргъанларында, жаланда прививка сакъларгъа боллукъду сабийни быллай къоркъууладан.

Россейни Саулукъ сакълау министерствосу былтыр иммуно-профилактика мадарланы тизмесине пневмококк инфекциягъа къажау прививкаланы да къошханды. Бу аурууну хатасындан хар жыл сайын жер башында 1,6 миллион адам ёледи. Жарсыугъа, аланы экиден бири беш жыллары окъуна толмагъан сабийледиле. Бизни къыралда бир жылгъа 500 минг чакълы адам къыйналады пневмококк инфекцияладан. Аланы ондан бири саулукъгъа бютюнда уллу заран саладыла. Бегирекда къоркъуулугъа уа ол санда пневмококк менингит (адамны мыйысы ауруйду) саналады. Инфекцияла къозгъагъан къулакъ аурууланы ючден бирини сылтауу да ол бактерияды.

Бир-бир ата-анала «бизни сабийибиз шёндю ансыз да ауруулуду, не прививка этерге кереклиси барды анга энтта да» деп алай айтадыла. Алай баланы иммунитети артыкъ кючлю тюйюл эсе, ауруу бютюнда осалгъа кетерикди. Алагъа вакцинацияны этмей жарамайды.

Саусузгъа бакъгъандан эсе аны аурутмазгъа тынч болгъаны эрттеден да белгилиди. Прививканы этдирмей болмайсыз деп, сизни къысаргъа бир адамны да эркинлиги жокъду. Кесигизге да, сабийлеригизге да игини бла аманны сиз айырасыз. Алай дагъыда эсгерирге сюеме, вакцинацияны этиуге къажау тургъанланы айтханларын тюзге санап,  сабийлерине прививкала этдирмеген ата-анала аланы саулукъларына, жашауларына да уллу къоркъуу саладыла.