Сакълыкъ - баш жорукъду

Нальчик шахарда Гигиена эмда эпидемиология араны ишчилери билдиргеннге кёре  кърым безгек Шимал Кавказда анда – мында чыгъа тургъанды. Ол бек къоркъуулу аурууладан бирине саналады.

Бу эмда кёп башха тюрлю аурууланы профилактикасы – мал губулагъа къажау жумушла бла байламлыды. Анга деп аслам адам жыйылгъан жерледе, ол санда парклада, стадионлада, сабий майданчыкълада да губуланы къурутур ючюн, энчи препаратланы хайырланыргъа керекди. Жарсыугъа, Роспотребнадзор  жыл сайын эсгертип тургъанлыкъгъа, шахар округланы эмда муниципал  районланы администрациялары бу жумушланы тамамларгъа ахча бёлмейдиле.

Аны хатасындан а сагъынылгъан жерледе губула кёбейе барадыла. Саулукъ сакълау-профилактика учреждениялагъа губу къабып  жыл сайын сабийле келедиле. Бек игиси олсагъат окъуна травматология пунктха неда амбулаториягъа барсагъызды. Анда  аны кетерип, сизни халыгъызгъа  да тынгылы къарап башларыкъдыла. Алай быллай учрежденияладан узакъда болсагъыз а,  губуну кесигизге кетерирге тюшерикди. Бу ишни, вирус (ол бар эсе) къаннга тюшмез ючюн, узакъ болжалгъа салмазгъа керекди. Губуну пинцет бла неда башха зат бла къысып, аз-аздан бура кетип, алай акъырын чыгъарадыла.

Тюзюнлей тартып чыгъарыргъа жарамайды, ол эсигизде болсун. Алай этгенде, кёбюсюнде губу юзюлюп, аны заранлы кесеги уа (вирус бла бирге) адамны терисинде къалады.

Пинцет жокъ эсе,  халыны хайырланыргъа боллукъсуз. Губу къапхан жерде териге анга жууугъуракъ тюйюмчек этип, акъырын буруп алай чыгъарылады ол. Сора  мычымай медицина учреждениягъа барыргъа керексиз.

Губуну банкагъа неда башха оруннга салып, Нальчикде Байсолтан улу орамда 33 юйде «Гигиена эмда эпидемиология арагъа» элтирге керекди. Аны этер онгугъуз жокъ эсе уа, губуну кюйдюрюгюз.