Жангылыкъла

Шалушкадан энди ишлене тургъан «Северный» автовокзалгъа элтген жолну къурулушу къыстау бара турады, деп билдиргендиле КъМР-ни Къурулуш эмда жол мюлк министерствосундан.

Аушигерде гидроэлектростанцияда бу кюнледе от ёчюлтюу жаны бла юйрениуле бардырылгъандыла. «РусГидро» компанияны Къабарты-Малкъарда бёлюмюнден билдиргенлерине кёре, анда ГЭС-ни администрациясы, республиканы от ёчюлтюучю-къутхарыучу службасы эмда МЧС-ни КъМР-де баш Управлениясы быллай къыйын болумлада бирге къалай ишлерге кереклисин белгилегендиле. Юйретиуге битеу да 60 адам къатышханды эмда онбир энчи машина хайырланылгъанды.

Былтыр Аушигерде орта школну къатында сабий садикни къурулушу башланнган эди. Бу иш «Демография» деген миллет проектни чеклеринде бардырылады, анда битеу да 40 жер боллукъду.

Къабарты-Малкъар къырал университетни Элбрус районда окъутуу-илму комплексинде «Электроникада микро- эмда нанотехнологияла» деген онбиринчи халкъла аралы илму-техника конференция бардырылгъанды.

Донорну битеудуния кюнюнде (14 июнь) Черек районда танымагъан адамларыны саулукъларына эмда жашауларына себеплик болур ючюн къан берирге келгенле аз тюйюл эдиле.

Майский шахарны 14-чю номерли орта школунда сабийлеге жай солуу кезиуде электрокючню къоркъуусузлу хайырланыучуну юсюнден дерс бардырылгъанды. Тёртюнчю классны тауусханла бла районну электросетини электромонтёру Виктория Базылева тюбешген эди, деп билдиргендиле «Каббалкэнергону» пресс-службасындан.

Электросетьледе къоранчланы азайтыуну, алада ремонт ишлени бардырыуну, ток ючюн тёлемей тургъанланы жууапха тартыуну юсюнден сёлешгендиле «Каббалкэнергода» бардырылгъан кенгешде. Аны ишине районланы электросетьлерини башчылары да къатышхандыла, деп билдиргендиле компаниядан.

РАН-ны Къабарты-Малкъарда илму арасында медицинада хайырланырча цифралы  томосинтез эталлыкъ кёп функциялы рентген комплексни жарашдырыу бла кюреше турадыла, деп билдиргендиле учреждениядан.

Илму арада айтханларына кёре, шёндю бек кенг хайырланылгъан диагностика амалгъа рентгенография саналады. Алай аны бир кемчилиги барды – ол шаугютлени бла сингирлени  хазна кёргюзталмайды. Аны уа сагъынылгъан комплекс бек тынгылы тамамларгъа керекди.

КъМР-ни Кёп функциялы арасында Ич ишлени министерствосуну республикада бёлюмлерини келечилери бла тюбешиу болгъанды. Сёз анда МФЦ, миграцияны вопрослары жаны бла Управление, Информация ара эмда къырал автоинспекция бла бирге ишлеуню юсюнден баргъанды, деп билдиргендиле учрежденияны пресс-службасындан.

16 июньда Урван районну «Аруан» технопаркында ралли-спортдан «BEAST RACE 2019» деген ат бла республиканы жай кубогу бардырыллыкъды, анга хар сюйген къатышаллыкъды.