Окъутууда тюрлениуле бла байламлы оюмларын айтхандыла

Бу кюнледе Къабарты-Малкъар къырал университетде педагогика, психология эмда физкультура-спорт билим бериу институтну педагогика колледжини Иш бериучюле бла байламлыкъны жаны бла советини орта профессионал билим бериуде  усталыкъ  кадрланы  хазырлау бла  байламлы  кенгертилген  жыйылыуу болгъанды. Анга  сагъынылгъан советни башчысы, педколледжини директору Фатима Ашабокова, советни  таматасыны,  педколледжни директоруну окъуу-методика иш жаны бла  орунбасары Марина Халишхова,  Жарыкъландырыу эмда илму министерствону школгъа дери эмда битеулю орта билим берген бёлюмюню башчысы Марина Мизова, КъМКъУ-ну карьераны айнытыу управлениясыны таматасы Ратмир Коцев, иш бериучюле, советни бирси келечилери да къатышхандыла.

Жыйылгъанланы алларында сёлеше, Фатима Ашабокова «Билим бериу педагогика илмула», «Башланнган класслада окъутуу» эмда «Школгъа дери билим бериу» деген усталыкъла бла  байламлы жангы стандартла  кийирилгенлерин айтханды. 2024 жылда дагъыда «Башланнган билим бериуде коррекциялы педагогика» эмда  «Энчи школгъа дери окъутуу» деген усталыкълада да жангы стандартла жашауда бардырыллыкъларын  билдиргенди.

Андан сора да, жангы  стандартлада «Физическая культура», «Туризм эмда къонакъбайлыкъ» деген усталыкълада да боллукъдула аллай тюрлениуле. Алагъа бюджет жерлени тарихи бу жол  кёллендирирчады – 2023 жылда  тогъузунчу  классланы  бошагъанлагъа бу усталыкъладан 50 бюджет  жер боллукъду.

Фатима Ашабокова, бу усталыкъланы  юслеринден айта, эм алгъа иш бериучюле бла кенгешип, алгъа  къаллай усталыкълагъа эмда не  ызлагъа кёре окъугъан адамла керек боллукъларын билип,  жаш тёлюню ол халда юйретир ючюн амалланы тюрлюлерин сайларгъа  тюшеригин ангылатханды.

Педколледжни директоруну окъуу-методика иш жаны бла орунбасары Марина Халишхова «Туризм эмда  къонакъбайлыкъ» билим бериу  программагъа «Туроператорланы эмда турагентлени жумушлары», «Экскурсия жумушла», «Къонакъ юйде жумушла» деген ызланы къошар онг боллугъун бла къаллыгъын да тинтирге  кереклисин белгилегенди.

Башланнган билим бериуню  теориясы эмда методикасы бла байламлы  предмет-цикл комиссияны башчысы  Ирина Багова уа, малкъар эмда къабарты тилле РФ-ни  къырал тиллеринден  бирлери болгъанлары, алай эсе да, алагъа ишлерге деп  кёргюзтюлген  программада ана тил эмда  адабият дегенча предметле белгиленмегенлери ючюн «Ана тилни окъутууну методикасы», «Ана тил бла адабият», «Ана тилли сабий литература шатык окъуу бла байламлы практикуму бла» деген дисциплиналаны кийирсе тюз боллукъду деген оюмун билдиргенди.

Дагъыда «Орус тил окъутуу методикасы бла» эмда «Сабий литература шатык окъутуу практикуму бла» деген  дисциплиналадан сагъатланы саны азайгъанлары бла байламлы эмда студентлени токъсан процентине орус тил ана тиллери  болмагъаны себепли специалистлени хазырлауну игилендирир ючюн сагъат  саннга эмда  кёргюзтюлген  тематикагъа тюрлениуле  кийирирге чакъыргъанды.

Физкультура жаны бла юйретиу предмет-цикл комиссияны таматасы Рузана Пшукова уа «Физкультура» усталыкъдан ФГОС-ланы 2014 жылдан башлап  былтыргъа дери тенглешдириу анализлерин этгенди. Ызы бла « Физкультура эмда спорт бёлюмде къошакъ  битеулю айнытыу программала бла окъутуу» деген усталыкъны къошууну ахшы амалгъа  санагъанын билдиргенди. Ол бийик усталыкъ даражалары болгъан эмда  конкуренциягъа чыдамлы специалистлени  хазырларгъа онг берлигин да чертгенди.

Минпросну келечиси Марина  Мизова КъМКъУ-ну педагогика колледжи жаш адамлагъа мурдорлу билим бергенин белгилегенди. Тюбешиуге келген иш бериучюле да  сагъынылгъан окъуу юйде специалистлени хазырлау тийишли даражада  болгъанын къатлап айтхандыла.

Жыйылыуда дагъыда «Школгъа дери билим бериу» усталыкъ жаны бла программагъа яслиге  жюрюген сабийчиклени  жыл  санлары бла  ишлеяллыкъланы хазырлауну да  къошууну тюз кёргендиле. Иш бериучюле уа, «Туризм эмда  къонакъ юйде иш» усталыкъгъа   ингилиз тилни да  билиуню  къыйматлылыгъын ангылатып, анга юйретиуню бу специальностьну  программасына  кийирирге деген кёз къарамларын билдиргендиле.

Ратмир Коцев а КъМКъУ-ну  бошагъанланы ишге тохташыуларыны эсеплерини юсюнден хапарлагъанды, «Факультетус» цифралы платформаны ол жаны бла къалай ишлегенин да ангылатханды. Иш бериучюлени платформалагъа жазылыргъа эмда аланы къаллай вакансиялары  барлыкъларыны,  усталыкъны ёсдюрген курслары болгъанларыны, жангы ызлагъа  тюшюндюрген тюбешиулеге  чакъырыуну да  юслеринден анда билдире турургъа  чакъыргъанды.