Патриот сезимлени айныта

Бу кюнледе Кёнделенни Энейланы Тимур атлы 4-чю номерли школуну башланнган классларыны 84 окъуучусу «Орлята России» деген Битеуроссей биригиуге къошулгъандыла. Бу программа «Россей Федерацияны инсанларын патриот жаны бла юйретиу», «Билим бериу» федерал миллет проектлени жашауда хайырланыуларыны бир тюрлюсюдю.

«Орлята России» къымылдау 2021 жылдан бери билим бериу учреждениялада ётеди. Аны мураты сабийни жашауда эм магъаналы затлагъа тюз кёзден къарагъа, аланы багъалай билирге, шуёхлукъда жашай эм биригип билим ала билирге юйретиудю. Дагъыда къыралын сюйген, анга бир тюрлю жаны бла хайыры тиерик патриот инсанланы ёсдюрюуде уллу магъанасы болгъан программады ол. Билим алыуда, спортда, илмуда эм жамауат жашауда, табийгъатны сюйюуде бла аны къоруулауда да ариу атламла этерге юйретген, таукеллендирген проект бизни республиканы битеу школларында тири ишлейди.

 Кёнделенде да школчуланы уллу байрамлары болгъанды десек, ётюрюк болмаз. Совет Союзну заманында октябрёнок, пионер, комсомол дегенча биригиуле болгъандыла, юйретиу ишни эм магъаналы кесеги эдиле ала. Нек дегенде иги окъумагъанланы октябрёнок этмей эдиле. Андан сора да, аланы бир бири араларында шуёхлукъларына, жан аурутууларына, болушлукъ эте билиулерине да уллу магъана бере, пионерлеге алай алгъандыла. Ата журтларына сюймекликлери не жаны бла да энчи, уллу болгъанланы уа комсомолгъа алгъандыла.

Ол ишле школлада арталлыда бардырылмай тохтап къалгъанлы иги кесек заман бола эди. Энди уа жангы излемле бла, жангы атла бла, башха-башха даражалада быллай биригиуле сабийлени школ жашауларына киредиле. Бюгюннгю кюнде ол аман тюйюлдю. Жерни юсюн кюйсюзлюк, къаугъала ала баргъанда, адамлыкъгъа элтген сезимлени сабийликден башлап айнытыулары, туугъан жерлерин, Ата журтларын сюйген патриотла ёсдюрюу да магъаналыды.

Кёнделенчиле ол кюннге аталып юйреннген назмуларын бла жырларын айтхандыла. Россейни байрагъын кётюрюп, гимнни жырлагъандыла. Ариу тепсеулери бла къонакъланы къууандыргъандыла. Къонакъда уа, алада Элбрус районну «Биринчилени атламлары», «Навигаторы детства» деген биригиулени таматалары бла келечилери блгъандыла. Кёнделенде ётген ишни ариу къуралгъанын, бийик даражада бардырылгъанын да чертгендиле.
Алай бла «Орлята России» биригиуге къошулгъан сабийле, боюнларына тагъылгъан галстуклагъа бла кёкюреклериндеги белгилеге тийишли бола, къыралыбызны, керти патриотлары болурла деп ышанабыз.