Иш хакъны юсюнден юч жанлы келишимге къол салыннганды

Республиканы Правительствосуну кезиулю жыйылыуунда ондан артыкъ бегимни эмда буйрукъну проектлерин сюзгендиле. Кенгешни КъМР-ни Правительствосуну Председатели Мусукланы Алий бардыргъанды.

Биринчи КъМР-ни финансла министри Елена Лисун келир жыл налоглары кадастр багъаларына кёре тергеллик объектлени (жерлеринден тепдирилмегенлени) тизмеси хазыр болгъанын билдиргенди. Ол хар жыл сайын жарашдырылады. Шёндю ары 1106 объект киреди.

Финансла министр дагъыда «Эм иги муниципал сынам» деген федерал конкурсда хорлагъан муниципалитетлеге дотацияла къалай юлешиниригин туура этгенди. Бизни республикадан ол эришиуде Бахсан шахар округ бла Кременчуг-Константиновское эл хорлагъандыла. Биринчиси «Муниципалитетде жашагъанла бла къыйматлы байламлыкъла къурау ючюн» номинацияда ал жерни алгъанды, эл а «Миллетлени араларында мамырлыкъ къурау» дегенинде хорлагъанды. Алай бла шахар округга федерал бюджетден - тогъуз миллион сом, ол элге уа – 6,3 миллион сом берилгенди.

«Таза суу» регион программа да тюрлендирилгенди. Къурулуш эмда ЖКХ министр Алим Бербеков айтханнга кёре, аны чеклеринде этиллик ишлеге 2023 эмда 2024 жыллада бёлюнюрюк 138,6 миллион сом быйылгъа кёчюрюлгенди. Бу ахчагъа онюч объектни къурулушу бардырыллыкъды эмда реконструкция этилликди.

«Транспорт системаны айнытыу» программаны «Къоркъуусуз эмда тынгылы жолла» кесегини чеклеринде келир жыл тамамланыллыкъ ишлеге 588 миллион сом бёлюнюрюкдю. Аны юсюнден транспорт министрни орунбасары Улбашланы Ислам билдиргенди. Дагъыда жамауат транспортну айнытыу жумушла бла байламлы талай кёрюмдюле экономиканы цифралы жаны бла тюрлендириу Стратегиягъа келиширча этилгендиле.

КъМР-ни маданият министри Мухадин Кумахов республиканы бюджетинден муниципалитетледе музейлени техника жаны бла онгларын кючлендириуге субсидияла берилликлерин билдиргенди. Дагъыда Нальчикде Маданият араны къурулушуну, элледе маданият – солуу учрежденияла къурауну эмда аланы, сора дагъыда сабий чыгъармачылыкъ школланы, жангыртыуну юсюнден сагъыннганды. 

Билим бериу организациялада илму-излем, илму-тинтиу, чыгъармачылыкъ ишле, физкультура эмда спорт бла кюреширге онгла болурча, алада мюлк-техника базаны жангыртыргъа оноу этилгенин жарыкъландырыу эмда илму министрни къуллугъун толтургъан Анзор Борукаев билдиргенди. Ол айтханнга кёре, бу жумушланы тындырыргъа деп федерал бюджетден субсидияла берилликдиле. Министерство уа этиллик ишлени тизмесин жарашдыргъанды.

Бу докладчы дагъыда муниципал бюджетлеге 8,3 миллион сом бёлюрге оноу этилгенин билдиргенди. Айтханына кёре, ахча иш хакъланы тёлеуге къаратыллыкъды.

Экономиканы айнытыу министри Рахайланы Борис, КъМР-ни Правительствосу, РФ-ни ФСО-суну Энчи связь эмда информация арасы бла келишим этеригин билдиргенди. Саулукъ сакълау министр Рустам Калибатов а Борчлу халда медицина страхование этиу фондну бюджети бла байламлы жумушланы юслеринден къысха айтханды эмда «Жюрек-тамыр ауруулагъа къажау кюрешиу» программагъа тюрлениуле кийирилгенин да туура этгенди.

Нальчикде келир жыл спортну шёндюгю пятиборье тюрлюсю бла кюреширге онг берген спорткомплекс эшиклерин ачарыкъды. Аны ишин бардырырча эмда жумушларына къарарча, къошакъ халда 61,7 миллион сом бёлюрге керекди, дегенди спорт министр Ислам Хасанов. Эл мюлк министр Хасан Сижажев а, Прохладна районда Благовещенка элде суу ызланы реконструкциясына хайырланылмай къалгъан 687,6 минг сомну артха бюджетге къайтарыргъа оноу этилгенин билдиргенди.

Ызы бла Правительствону, профсоюзланы эмда Промышленниклени бла предпринимательлени союзуну араларында келишимге къол салыннганды. Мусукланы Алий айтханнга кёре, аны болжалы 2023-2025 жылла бла чекленеди. Ол кеси да иш хакъны эм аз ёлчемин тохташдырады. Алай бла бюджетледен тышында сферада ол эки МРОТ тенглиди. Коммерциялы болмагъан, сора дагъыда сакъатла къурагъан организациялада, республикалы, къырал эмда муниципал учреждениялада уа - бир МРОТ.