Энчи эс – социал магъаналы жумушлагъа

Россейни Президентини буйругъуна тийишлиликде 2022 жыл къыралыбызны халкъларыны маданият хазналарын сакълаугъа жораланнганды. Аны чегинде тамамланнган ишле халкъ чыгъармачылыкъны айнытыу, миллетлени энчиликлерин, культура эм тарых эсгертмелени къоруулау бла байламлыдыла. Бу борч Элбрус районда къалай толтурулгъаныны юсюнден ушагъыбызда культура управленияны башчысы Къабарты-Малкъарны Маданиятыны сыйлы къуллукъчусу Толгъурланы Жаннет айтханды.

Ол белиглегенича, маданият деген ангыламгъа адет-тёреле, социал низам, адамла бир бирлери бла байламлыкъла жюрютгенде жорукъла киредиле, ала барысы да тёлюден-тёлюге ёте айныйдыла. Жамауатны эстетика, информация, коммуникация излемлери да ёсе барадыла. Инсан къайсы социал къауумгъа къошулгъанына, билимине, усталыгъына къарамай, культурагъа тартылады. Къыралыбызда жашагъан халкъланы маданиятларына аслам эс да бёлюнеди.

Районда бюгюнлюкде 26 культура учреждение барды, тюрлю-тюрлю кружокла да 60-дан асламдыла, алагъа битеу да 2760 адам жюрюйдюле, аланы араларында абаданла, сакъат сабийле да бардыла. Маданият юйледе орналгъан кружокла барысы да хакъсыз ишлейдиле. 5 художестволу къауумубузгъа «юлгюлю» эм «халкъ» деген атла берилгендиле. Бусагъатда ал сатыргъа социал магъаналы жумушла чыгъадыла. Аслам магъана клубланы неда бардырылгъан мероприятияланы санына угъай, туугъан жерге сейирни къозгъагъан проектлеге, Ата журтха сюймекликге, тарыхыбызгъа, миллет тёрелеребизге хурмет этерге юйретген башламчылыкълагъа бериледи. Жамауатны тин жаны бла излемлерине да къаралады, культура учрежденияланы специалистлери башха-башха жыл санда адамлагъа не сейир болгъанын биледиле – ол ишибизни планын жарашдырыргъа болушады. Анга кёре байрам эм юбилей кюнле ётдюрюледиле, халкъ эм миллет байрамла къураладыла. Сёз ючюн, былтыр 2360 мероприятие – эришиуле, фестивальла, кёрмючле, концертле эм башхала – бардырылгъандыла. Быйылгъы ишлени иги кесеги республиканы 100-жыллыгъына аталыпдыла.

2021 жылда ол мурат бла республиканы «Къабарты-Малкъарны культурасы» деген программасына кёре Къулийланы Къайсынны атын жюрютген маданият арабызгъа регион бюджетден 500 минг берилгенди, ол ахчагъа мебель, компьютерле, микрофонла алыннгандыла. «Культура» миллет проектни хайырындан къыл-къобуз, музыка аппаратура къоллу болгъанбыз. Ара библиотека Модель китапхананы къурауда конкурс айырылыудан ётгенди, аны ючюн анга 10 миллион грант берилгенди, бу ахчагъа анда толу ремонт этилликди, шёндюгюлю оборудование келтирилликди. Тырныауузда Эсгериу майдан жангыртылгъанды, Элбрус элде Приэльбрусьяны къоруулай ёлген, Быллымда Ата журтну къоруулай жан берген аскерчилени эсгертмелерине да къаралгъанды.

Быйыл «Гитче Ата журтуму маданияты» федерал проектге кёре районну краеведение музейини техника хазнасын игилиндирирге, Быллымда Маданият юйню кереклерине къараргъа, Кёнделенде Ата журтну къоруулай ёлген аскерчилени къарындаш къабырларында эсгертмеге толу ремонт этерге белгиленеди. Андан тышында, Культура юй, Кёнделенни Жеттеланы Мустафирни атын  жюрютген сабий музыка школ да жангыртыллыкъдыла. Бедикде, Огъары Бахсанда, Элбрусда жангы культура юйле ишленирикдиле.

- Эм уллу жарсыу профессионал билимлери болгъан специалистлени жетишмегенлериди. Бу халны тюзетир ючюн, чыгъармачылыкъ бла кюрешген жаш адамланы профильли усталыкъ билим алыргъа республикада, Краснодарда бла Москвада билим бериу учреждениялагъа иебиз, - дейди ол. – Чыкъгъан проблемалагъа къарамай, маданият учрежденияла салыннган борчланы жетишимли толтургъанларын белгилерчады.