Жарыкъ умутлары алыкъа алдадыла

Сентябрь да жетип, энди бюгюнлюкде быйыл школланы тауусханла жер-жерлеге окъуугъа кирип, дерслерине жюрюп башлагъандыла. Айхай да, ала муратларына жетгенлерине къууаннганларына, мындан ары да ахшы жетишимлеге жетер умутлары болгъанына не сёз.

Быйыл мектепни бошагъанладан бири Жабелланы Амирады. Ол Нальчикни отуз экинчи номерли школун ахшы белгилеге тауусханды. Энди уа КъМКъУ-ну медицина факультетини «педиатрия» бёлюмюню студентиди.

Чертирге тийишлиди, къыз сагъынылгъан факультетде бюджетде окъургъа тюшгенди. Ол билим алгъан бёлюмге бу жол 49 бюджет жер берилгенин эсге алсагъ а, аны жетишимлерине бютюнда къууанырчады. Медицина факультетге окъуугъа киргенни тынч болмагъанын а барыбыз да билебиз.

Амира школда биринчи классдан да иги окъугъанды. Сабийлигинден да врач усталыкъны сайлап, атасыны къысха жууугъу, белгили хирургубуз Бапыналаны Маратча профессионаллагъа ушаргъа итиннгенди. Аны себепли тамата класслада болгъанында орус тилге, химиягъа эмда биологиягъа асламыракъ эс бургъанды. Бош заманы болса да, бу предметден темаланы къайтарыргъа излегенди.

Мектепде дерслеринден тышында да, ол репетиторлагъа жюрюгенди. Ала салгъан къыйынны белгилеп, орус тилден Марина Чашифовна Шогеновагъа, химиядан а Елена Борисовна Щербаньнга ыразылыгъын билдиреди.

– Ала асыры кёп иш бергенден башынгы ёрге кётюрюр заман да къалмай эди. Болсада ала бизге ол халда юйретгенлерине бютюн къууаннган этгенме. Алай бла унутханыбызны эсге тюшюрюрге онг чыкъгъанды. Къауумланы бирге жыйып, дагъыда къошакъ халда бардыргъан дерслери ючюн сау болсунла, – дейди.

Репетиторланы къыйынлары зырафына кетмегени уа ЕГЭ-лени эсеплеринде да кёзге туура болгъанды. Алай бла Жабелланы къызлары химиядан – 90, орус тилден а 85 баллгъа тийишли болгъанды. Эсеплерин саулай да бирге алып айтханда уа, эки жюзден иги да асламды. Аны хайыры бла уа ол огъарыда белгилегенибизча, окъуугъа бюджетге киргенди. Кеси уа къууаннганы бла бирге сейирсиннген да этгенин жашырмайды. Амира къагъытларын беш вузгъа берген эди да, аланы барысына да ётгенди (бюджетге). Эсгерте кетейик, биле болурсуз, бизни университетге окъуугъа тюшер ючюн а, бирси окъуу юйледен эсе да бийигирек балла сураладыла.

Кесибизде студент болургъа онг чыкъгъанына, айхай да, ата-анасы да къууанып, мында къалса сюйгенлерин билдиргендиле. Къыз да аланы айтханларына тынгылап, мында окъургъа къалгъанды.

Барыбыз да билебиз бу факультетде окъургъа тынч болмагъанын. Алай эсе да, студент къыз вузну волонтёр клубуна кирип, мында да жамауатха жарар акъылдады. Педиатрия ызны сайлагъанын а, сабийлеге бакъгъан врачха жаланда гитчелеге угъай, абадан адамланы саулукъларына къараргъа да эркинлик берилгени бла байламлы  болгъанын айтады.

Къайсы жаш адамныча, Амираны муратлары алыкъа алдадыла. Студент жашаууна энди атлам алгъан къызчыкъны жарыкъ умутлары толуруна ийнанабыз. Ол кесини окъууда, ишде да жетишимлери бла алчыланы эмда билимлилени сатырында болур, сайлауу къадарын алдамай, ата-анасыны, юйретген устазларыны, кесини атын да иги бла айтдыргъанлай турур деп да ышанабыз.

Жаш тёлюбюзде окъуугъа-билимге тартылгъанларыбызны барлыкълары бизни да кёлюбюзню кётюреди. Ала келир заманда жамауат арасында кеслерини жолларын табып, медицинаны, башха бёлюмлени да айнырларына себеплик эте, ёз юлюшлерин къошарла деген умутдабыз.