Жюрекден келген алгъышла, гюлле, саугъала да

Бу кюнледе Нальчикни отуз ючюнчю номерли мектебини мурдорунда «Россейде Жылны устазы – 2022» деген Битеуроссей конкурсну шахар округда бардырылгъан урумуну бошалгъанын къууанчлы халда белгилегендиле. Аны хурметли къонакълары уа КъМР-ни жарыкъландырыу, илму эмда жаш тёлюню ишлери жаны бла министрини орунбасары Екатерина Мисостова, Битеуроссей халкъ фронтну регионда бёлюмюню келечиси Ислам Макоев, эришиуню жюриси, устазла, окъуучула, ата-анала да болгъандыла.

Эсгерте кетейик, быйыл конкурсну сагъынылгъан кесегине башха–башха предметледен окъутхан он устаз къатышханды. Ала бир ыйыкъны ичинде танымагъан окъуучуларына дерсле бергендиле, мастер-классла бардыргъандыла.

Педагогланы быллай даражалы эришиуге къатышханлары бла алгъышлай, Екатерина Николаевна устаз къаллай бирге билимли, хунерли болса да, сабийлени да аллай бирге кеси берген предметни жашырынлыкъларына тюшюндюраллыгъын чертгенди. Къайсы усталыкъда уруннганнга да конкурс эм алгъа аны жаланда иши бла байламлы сынам болуп къалмай, жашауда да аслам затха юйретгенин айтханды.

Эришиуню къураргъа, бардырыргъа да себеплик этгени ючюн къонакъбай школну директору Казбек Бляниховха, администрацияны келечилерине, устаз коллективге да ыразылыгъын билдиргенди. Конкурсда бюгюнлюкде айырмалы болгъаннга, бирсилеге да мындан арысында жетишимле тежегенди.

Билимлерин баямлагъан педагогланы жюрини келечиси, СКГИИ-ни ректоруну орунбасары Эфендиланы Фуад да алгъышлагъанды. Ол кеси устаз усталыкъ къаллай фахмуну, билимни излегенин толу ангылагъанын эмда сезгенин белгилей, аланы эришиуде кёргюзтген хунерлиликлерине сейирсиннгенин, къууаннганын да жашырмагъанды. Энчи ыразылыгъын а школну окъуучуларына билдирип, мектепни таууссала, аллай, ишлерге сюйген, ачыкъ кёллю да сабийлени институтда студентле болуп кёрюрге излегенин да айтханды.

Жюрини таматасы шахар округну билим бериу департаментини башчысыны къуллугъун толтургъан Валентина Сабанчиева бла сопредседатели, Нальчикни халкъгъа билим бериуде эмда илмуда ишлегенлерини профсоюзларыны шахар комитетини таматасы Татьяна Вологирова да алгъышлагъандыла конкурсантланы. Ала бу эришиуге кеслерини келечилерин тынгылы даражада хазырлап жибергенлерин чертгендиле. Ол а конкурс билим бериуде уруннганлагъа энчи магъананы тутханын ачыкълагъан ышан болгъанын да белгилегендиле.

Ызы бла уа ала эришиуню башха-башха номинацияларында айырмалы болгъанланы ачыкълап, алагъа саугъала, дипломла да бергендиле. Алай бла педагогланы санында Нальчикни онжетинчи номерли битеулю билим берген школуну географиядан устазы Улбашланы Фарида «Хорламгъа итиниулюк ючюн» деген диплом бла белгиленнгенди. Жыйырманчы номерли мектепде ингилиз тилден педагог Малкъондуланы Лаура уа «Усталыкъгъа кертичилик ючюн» деген бёлюмде айырмалы болгъанды.

Эки тюрлю номинацияда бирча энчиленнген а Аслан Кашежевди – «Эм иги методикалы семинар» бла «Эришиуню эм тынгылы дерси». Дагъыда ол сагъынылгъан конкурсну Нальчик шахар округда бардырылгъан урумунда биринчи жерге тийишли болгъанды. Экинчи номерли лицейде физикадан бла астрономиядан окъутады.

Эсгерте кетейик, Аслан Зарифович бу жолгъа дери да быллай эришиуде алчылыкъны алгъан эди. Конкурсну тарыхында шахарда бир устаз экинчи кере да быллай даражалы эришиуде биринчи оруннга чыкъгъан шарт эндиге дери болмагъанды. Жууукъ заманда (апрельге белгиленнгенди конкурс) ол аны республикалы урумунда да ачыкъларыкъды кесини хунерин. Эришиуню тёрелерине тийишлиликде келир жылда уа ол экинчи лицейде бардырыллыкъды.

Конкурсну жабылгъаны бла байламлы къууанчлы ингирде, устазланы алгъышлап, аланы дипломла, ахча саугъа бла Ислам Макоев да къууандыргъанды. Дагъыда белгили тележурналист Герийланы Сафар бла философия илмуланы доктору Эфендиланы Фуад эришиуню барыууна себепчилик этгенлери ючюн белгиленнгендиле. Къонакъбай школну сабийлери педагоглагъа гюлле бла бирге къызыл алмаланы да бергендиле. Айтыугъа кёре, алгъын окъуучула устазларындан ахшы белгиле сакъласала, алагъа аллай алманы саугъалап болгъандыла.

Андан сора да, бу мектепге жюрюген жашладан бла къызладан къуралгъан жюрини келечилери кеслерини призлерин Анна Карпушкинагъа тийишли кёргендиле. Ол жыйырма тогъузунчу номерли школда башланнган класслада дерсле береди.

Тюбешиуню кезиуюнде жюрекден айтылгъан алгъышланы жырла, аланы уа тепсеуле алыша, ингир тынгылы къуралгъанды. Отуз ючюнчю номерли окъуу учрежденияны  келечилери къонакълагъа не заманда да хазыр болгъанлары бла бирге алагъа ачыкъ ниетден тюбегенлерин да толусунлай баямлагъандыла.