Эл мюлкню айнытыуну онглары сюзюлгендиле

Россейни Президенти Владимир Путин Ставропольда къырал жумуш бла болгъанды эмда  къыралыбызны агропромышленность комплексини келечилери бла тюбешгенди. Ушакъны кезиуюнде АПК-ны айнытыуну онглары сюзюлгендиле.

Къабарты-Малкъардан тюбешиуге «Каббалкрастениеводство» компанияны баш директору Анзор Кумыков къатышханды. Ол анда республикада терек бахчачылыкъ къалай айныгъаныны юсюнден хапар айтханды эмда  ол жаны бла бизни регионубуз алчыланы санында болгъанын эсгертгенди. Къабарты-Малкъаргъа жангы болгъан ишни юсюнден да сагъыннганды республиканы келечиси. Ол а сабийлеге эмда татлы аш-азыкъ чыгъаргъанлагъа деп алмадан пюре жарашдырыуду.

Анзор Кумыков Россейни эл мюлкюнде уруннганланы жарсытхан сорууну да кётюргенди, дизель отлукъну багъасы асыры уллу болгъанын эсгертгенди.

Тюбешиуню юсюнден оюмун айта, КъМР-ни Башчысы Казбек Коков аны кезиуюнде бардырылгъан ушакъ бёлюмню андан ары айнытыугъа себеплик этеригине, Президент берген буйрукъла толтурулмай къалмазлыкъларына ишексиз болгъанын билдиргенди.

«Саулай алгъанда, Къабарты-Малкъаргъа 2023 жылда АПК-ны айнытыугъа 3,7 миллион сом чакълы бёлюннгенди. Ол ахча битимчилик, малчылыкъ, аш-азыкъ эмда жарашдырыучу промышленность бла байламлы проектлени жашауда бардырыугъа, эллени айнытыугъа да къоратылады.

Сугъарыугъа да уллу эс бурабыз. Аллай жерле битеу да 6,4 минг гектаргъа жетгендиле. Ол а былтырны кёрюмдюлеринден юч кереге кёпдю.

Толу болмагъан шартлагъа кёре, эл мюлк продукцияны ёлчеми 2022 жыл бла тенглешдиргенде, 110 процентге жетер деп сакълайбыз. Агропромышленный комплексни андан ары айнытыр ючюн, къолубуздан келгенни аярыкъ тюйюлбюз, эл мюлкде уруннганлагъа да  себеплик этгенлей турлукъбуз», - деп жазгъанды Казбек Коков телеграм-каналында.