Спорт

Екатеринбургда къатыш единоборстволадан «ММА Russian Cagefighting Championship — «RCC: INTRO» эришиуде Къабарты-Малкъардан спортчу Жаппуланы Альберт, сермешин болжалдан алгъа хорлам бла бошап, биринчи жерни алгъанды, деп билдиргендиле республиканы Спорт министерствосуну пресс-службасындан.
    Альберт «Гладиатор» клубда жарау этеди, онюч сермешинден онбиринде къытханды. Бу жол ол Пермьден сынамлы гёжеф Евгений Лазуков бла тюбешгенди эм аны 10:4 эсеп бла хорлагъанды. Аны тренер Мартин Афашагов юйретеди.

Ноябрьде Амстердамда профессионал грепплингден «NAGA» деген ат бла Европаны чемпионаты бардырылгъан эди. Анда бизни республикадан «Файт Зона» клубну спортчулары жетишимли болгъандыла. Алчы жерлеге Алим Мешев, Рустам Юнус, Руслан Шухостанов чыкъгъандыла. Ахыргъы эришгенинден тышында, жашланы тренериди.

Акъ-суучу Геляхланы Музафар  каратени киокушинкай тюрлюсюнден   алгъаракълада   Алма-Атада бардырылгъан дунияны чемпионатында,  75 килограммгъа дери ауурлукъда кюрешип, доммакъ майдалгъа тийишли   болгъанды. Таулу жаш ары дери да  тюрлю-тюрлю  магъаналы эришиулеге къатышханды, алчылыкъны да алып тургъанды. Къазахстандагъы чемпионатха уа  кёп къыралладан  бек кючлю спортчула къатышханларын эсге алсакъ, анда алыннган белгини бек сыйлыгъа санаргъа боллукъду.

Хар жетишимли спортчуну жанында неда команданы башында тренер турады, аны къыйыны чексиз уллуду. Ол, билимин, къарыуун аямай, сабийлени, абаданланы юйретеди, аланы фахмуларын айнытады, спортда бийик кёрюмдюлеге итиндиреди, алагъа жетерге да болушады. Сёзсюз, бу иш тёзюмлюк, кюч да излейди. Аны ючюн тренерле алгъыннгы спортчула боладыла, ала къыйын жарауланы, сермешлени кеслери ётгендиле эм жыйгъан сынамларын энди башхалагъа берирге, юлгю болургъа хазырдыла.   

Право низамгъа бузукълукъланы азайтыр мурат бла Элбрус районну Физкультура эм спорт комитети сакъат сабийлени араларында эришиуле къурагъанлы юч жыл болады. Быйыл а алагъа республиканы спорт-адаптив школунда юйреннгенле да къатышхандыла.   

Къабарты-Малкъарны курортларында солугъанланы саны, былтырны бу заманы бла тенглешдиргенде, 8,5 процентге кёбейгенди. Къонакъла бегирек да Черек, Чегем эм Элбрус районлада тау лыжа курортланы бла солуу жерлени сайлайдыла. 2018 жылны тогъуз айында алада 420 мингден аслам адам болгъандыла. Битеу да республикада курорт-солуу эм турист комплекслени бла предприятияланы саны 215-ге жетеди.

Башха миллетлени келечилерине хурмет этерге юйретир, жаш адамланы араларында шуёхлукъну игилендирир, жангы башлагъан спортчуланы усталыкъларын ёсдюрюр муратда Тырныауузда  В.А. Губанов атлы «Геолог» спорт-саулукъ кючлеу комплексде грек-рим тутушуудан эришиу къуралгъанды. Анга Нальчик, Бахсан шахарладан, Зольск, Бахсан эм Элбрус районладан 2002-2007 жыллада туугъан 85 гёжеф къатышхандыла.