Жетишимлери бла ёхтемленирчады

Башха-башха жыл санда тёрт жюзге жууукъ сабий жараугъа Элбрус районну Байзуллаланы Юсюп атлы  олимпиада резервли спорт школуна келедиле. Былтыр анда грек-рим тутушуудан бла спорт гимнастикадан бёлюмле ачылгъандыла. Сынамларына кёре  спортчуланы эки къууамгъа юлешедиле: башланнган эм жарау этиу. Усталыкъларын ёсдюрюп, сынам жыйгъанланы уа бийик спорт усталыкъ къауумлада сакълайдыла, алада онжети тренер ишлейдиле.

Алгъа жыллада спорт школну Кёнделенде бла Быллымда бёлюмлери ачылгъандыла. Ол а элледе жаш тёлюге грек-рим тутушуу бла кюреширге онг бергенди, ала да тюрлю-тюрлю даражалы эришиуледе ахшы кёрюмдюле болдура башлагъандыла. Алгъа жылладача, былтыр да спорт школ жетишимли болгъанды. Аны келечилери 49 эришиуге – чемпионатлагъа, биринчиликлеге, жер-жерли эм халкъла аралы турнирлеге – къатышхандыла, алада кёп майдал да алгъандыла.

Эм уллу жетишимле бла атын Локияланы Жамболат айтдыргъанды, ол Россейни Суздальда ётген чемпионатында кюмюш майдалны алгъанды, Казаньда Спортну жай тюрлюлеринден битеукъырал спартакиадада, Совет Союзну Жигити М.А. Аксёновну хурметине аталып къуралгъан халкъла аралы эришиуде эм къарыулу гёжефлени араларында саугъа жерлеге чыкъгъанды. Аслан Толов Тырныауузда Байзуллаланы Ю.К. бла Мирзойланы Х.Т. хурметлерине аталгъан битеуроссей эришиуде хорлагъанды, Сургутда  Социализм Урунууну Жигити Фармат Салмановну хурметине жораланнган турнирде ючюнчю жерни алгъанды. 

Жаш умутландыргъан  спортчула, усталыкъларын ёсдюрюп,  округ эм битеукъырал эришиуде хорламлары бла къууандыргъандыла. Юлгюге, Локияланы Руслан Россейни 18 жыллары толмагъан спортчуларыны араларында чемпионатында «кюмюшню» алгъанды, Кацийланы Абдурахман жер-жерли округну чемпионатында хорлагъанды, Махийланы Азрет-Али Ара федерал округну биринчилигинде «алтынны» алгъанды. Даражалы эришиуледе ахшы кёрюмдюле Жаппуланы Ислам, Чеченланы Амаль, Бапыналаны Къурман, Жашууланы Хасан, Зариф Минасов, Хапаланы Ислам, Шауаланы Исса, Отарланы Омар болдургъандыла. Кеслерин иги жанындан Малкъарланы Омар, Тохаланы Альберт, Жеттеланы Омар, Урчукъланы Къурман, Балаланы Алий, Отарланы Залим, Къулчаланы Марат, Тёппеланы Жандар эм башхала кёргюзтгендиле.  

Спорт гимнастиканы бёлюмюнде жетишимлени юслеринден айтханда, мында жарау этгенле къарыуларын ёсдюргенден, чыныкъгъандан сора да, эришиулеге къатышырча да болгъандыла. Мында умутландыргъан спортчуладан бири Бэлла Губашиевады, ол биринчи абадан разрядда сынашады.  

 Жыл сайын школда бийик квалификациялы спортчуланы санына да къошула барады. Былтыр «Россейни спортуну устасы» деген ат Махийланы Азрет-Алиге берилгенди. Спортну устасына нормативни Кацийланы Абдурахман да толтургъанды. Зариф Минасов, Жашууланы Хасан,  Тёппеланы Жандар, Жаппуланы Таулан, Ёзденланы Заурбек спортну устасына кандидатла болгъандыла, асламлы разрядланы 186 гёжеф алгъандыла. Юч гёжеф – Локияланы Жамболат бла Руслан, Жаппуланы Ислам – къыралны жыйымдыкъ командасына киредиле.

Бусагъатда жарау этгенлени араларында спортну халкъла аралы бир устасы, спортну юч устасы, эки жюзден кёбюрекни асламлы разрядлары барды. Быллай бийик кёрюмдюле учрежденияда сынамлы тренерле ишлегенлерини хайырынданды. Россейни сыйлы тренери – школну директору Локияланы Юрий, Хапаланы Аслан, Ачабайланы Музафар, Балаланы Алим, Ёзденланы Мухтар, Башийланы Махмуд (грек-рим тутушуу), Наталья Губашиева (спорт гимнастика) – ала барысы да гёжефлени юйретиуге, аланы жетишимли болурларына къарыуларын, билимлерин да аямайдыла. Махкемеде бийик усталыкълы спортчуланы хазырлагъандан тышында, физкультура-саулукъ кючлеу, юйретиу иш да бардырылады.