Сынауланы эсеплери ышандырадыла

Къабарты-Малкъар къырал университетде тогъузунчу-онбиринчии классланы ачыкъ предмет олимпиадалары андан ары бардырылгъандыла. Бу кюнледе уа математикадан «Мнимая единичка» деген ат бла озгъан сынауну эсеплери белгили болгъандыла. Анга жетишимли къатышханланы арасында Нальчикни жетинчи, тогъузунчу, онтёртюнчю, жыйырма тогъузунчу номерли школларыны келечилери бардыла. Сёз ючюн, Эттеланы Ибрагим (29-чу  школ, 10 класс) бла Хаджиланы Ренат (14-чю гимназия-школ, 11 класс) аланы  санындадыла.

Дагъыда шахарны окъуучуларыны юслеринден айтханда, ала алгъаракъда къарачай-малкъар тилден бла адабиятдан республика даражалы ачыкъ олимпиадагъа да къатышхандыла. Аладан жетишимли болгъанланы белгилесег а, жыйырма тогъузунчу номерли мектепни онбиринчи классындан Салпагъарланы Азамат биринчи жерге чыкъгъанды. Экинчи оруннга уа Бийчеккуланы Къанамат тийишли болгъанды. Жашланы бу дерсден устаз Локияланы Анжела Махмутовна окъутады.

Ачыкъ олимпиадаланы арасында эм къыйынладан бирине экономика ыз саналады. Болсада жашауну сурамларына  кёре, бу сынауда кеслерини билимлерин ачыкъларгъа излегенлени саны жылдан-жылгъа ёсе барады. Бу жол анга онбиринчи классда окъуй тургъанладан жыйырма адам къатышханды. Аладан биринчи жерге чыкъгъан болмагъанды. Экинчи орунну уа тогъузунчу номерли школну келечисине тийишли кёргендиле. Аны бу олимпиадагъа хазырлагъан а Тетууланы Алисады.

Андан тышында, окъуучула физикадан «Келир заманда табийгъатны эмда технологияланы законлары» деген ат бла бардырылгъан сынаулада бу жаны бла кеслерини хунерлерин ачыкълагъандыла. Олимпиадагъа алтмышха жууукъ жаш бла къыз къатышханды. Мында уа ючюнчю жерни жыйырма тогъузунчу номерли мектепден Мухамед Ибрагимов бла онтёртюнчю гимназиядан Хочуланы Рашит юлешгендиле. Аланы Малкъондуланы Ляна Мухадиновна бла Алим Галиевич Хусинов окъутадыла.

«Орус литератураны дуниясы» деген ачыкъ олимпиадада уа жыйырма жетинчи номерли школдан Улбашланы Лейля экинчи жерни алгъанды. «Психология» ызда да биринчи оруннга чыкъгъан болмагъанды. Экинчи жерге – Лина Бадракова (2-чи номерли лицей), ючюнчюге уа Дисана Кашежева (14-чю гимназия) тийишли болгъандыла.