КъМР-ни Башчысы «муниципал сагъатны» бардыргъанды

КъМР-ни Башчысы Казбек Коков ыйыкъ сайын бардырылыучу «муниципал сагъатны» кезиулю жыйылыуун ётдюргенди. Анга КъМР-ни Правительствосуну Председатели Мусукланы Алий, КъМР-ни Башчысыны Администрациясыны таматасы Мухамед Кодзоков эм муниципал къуралыуланы оноучулары къатышхандыла.

Жыйылыу эллени электрокюч бла жалчытыуну сорууларына къарау бла башланнганды. Республиканы Башчысы белгилегенине кёре, къыйын хауа болумланы хатасындан ток баргъан чыбыкъла юзюлгендиле, алыкъа тамамланырыкъ ишле кёпдюле. МЧС-ни билдириулерине кёре, кюнню халы жууукъ кюнледе тюзеллик тюйюлдю.

КъМР-ни къурулуш эмда жашау журт-коммунал мюлк министри Алим Бербековну айтханына кёре, битеу бардырылгъан ишле «Шимал Кавказ Россети» компания бла келишип этиледиле. Жетинчи декабрьге Залукокоажеде, Светловодскийде эм Каменномостда электрокючню бериу ишле бошалгъандыла. Бахсан районда Куба, Баксаненок, Куба-Таба, Атажукино, Исламей эм Заюково элледе ток баргъан ызланы жалгъау ишле бардырылгъандыла. Чегем районну Тёбен Чегем, Яникой, Хушто-Сырт, Лячинкъая эллерине эм Чегем шахаргъа ток берилирча этилгенди. Болсада авариялы ишле андан ары да бардырыладыла, ток баргъан чыбыкъла жангыдан юзюлгенлери себепли. Шёндю энергетикле кече-кюн демегенлей урунадыла. Зольск, Бахсан эм Чегем муниципал районланы оноучулары жер-жерледе къаллай болумла болгъанларыны эм не мадарла этгенлерини юсюнден билдиргендиле.

 «Муниципал сагъатда» андан сора да РФ-ни Президенти Владимир Путинни Жеринден тепдирилмеген къырал ырысхыны федерал информация системасы къалай ишлегени бла байламлы берилген буюурулары къалай толтурулгъанларына къарагъандыла.

Сагъынылгъан соруу бла КъМР-ни жер эмда ырысхы бла байламлы халланы министри Аслан Тохов доклад этгенди. Андан сора да жыйылыуда Росреестрни Къабарты-Малкъар Республикада управлениясыны таматасы Беслан Соблиров, Нальчик  шахарны администрациясыны башчысы Таймураз Ахохов, Прохладна муниципал районну башчысы Андрей Журавлев, Бахсан муниципал районну администрациясыны башчысы Артур Балкизов сёлешгендиле. Сагъынылгъан информация амал муниципалитетлеге жерле бла къыйматлы хайырланыргъа эм айныргъа онг берликди, деп четгенди Казбек Коков. Жер-жерли администрациялагъа белгиленнген ишлени тамамларгъа методика, административ, финанс эм техника жаны бла болушлукъ этилликди.

Жыйылыугъа къатышханла миллет, федерал эм регион проектле къалай бардырылгъанларына къарагъандыла. Белгилегенлерине кёре, 2022 жылгъа тамамланырыкъ ишле бошала турадыла.

Правительствону Председатели Мусукланы Алий чертгенине кёре, республикада жети регионал проект бардырылады, аладан ючюсю толусунлай битгендиле. Ала «Хар сабийни жетишими», «Чыгъармачылыкъ иш бла кюрешген адамла» эм «Жашау журтла» деген  проектледиле, къалгъанларыны жаны бла ишле бардырыла турадыла.     

Жер-жерли бюджетле 2022 жылда 11 айгъа къалай толтурулгъанларыны юсюнден республиканы финансла министри Елена Лисун билдиргенди.

«Январь-ноябрь айлагъа жыйылгъан ахчаланы саны 17,7 миллиард сом болгъанды, былтырны ол кезиую бла тенглешдиргенде ёсюм 116,2 процентди. Аладан налогла эм налоглагъа саналмагъан ахчаладан 5,1 миллиард сом жыйылгъанды, озгъан жылны бу кезиую бла тенглешдиргенде ёсюм 599 миллион сом болгъанды», - дегенди министр.

Елена Лисун айтханнга кёре, битеу муниципал къуралыулада налогланы жыйыу жаны бла хал игиди. Этилген къоранчла, ол санда кеслеринден жыйылгъан ырысхы 4,8 миллиард сом болгъанды, ёсюм 108 процентди.     

Правительствону Председатели айтханнга кёре, муниципал къуралыуланы таматалары биринчи январьдан тебиреп налог тёлеуню бирикген системасы кийириллигин эсге алыргъа эм ол болумлада ишлерге предприятияла бла биригиуле шёндюден тебиреп хазырланыргъа керекдиле.

«Муниципал сагъатда» къаралгъан соруулагъа кёре республиканы оноучусу къауум буюуру бергенди, деп билдиредиле КъМР-ни Башчсыны бла Правительствосуну пресс-службасындан.