Энтта да бир кёпюр жангыртылгъанды

Кёп болмай кёпюрню къурулушу бла кюрешген  подряд организацияны келечилери  «Прохладный — Баксан — Элбрус» А-158 федерал жолда Элбрус элни къатында орналгъан, узунлугъу  жыйырма беш метрге жетген кёпюрге тынгылы ремонт этип бошагъандыла.  Ишлени кезиуюнде объектни кенглигине беш метр къошулуп   онюч метрге дери жетдирилгенди.    

Росавтодорну автомашина жоллагъа къарагъан  «Кавказ» управлениясыны заказы бла  эки жылны ичинде специалистле эски кёпюрню мурдоруна дери кетерип, хар несин да  жангыдан ишлегендиле. Ол санда алгъындан кючлю  чигинжиле бла  аркъаула салгъандыла, башына арматурладан аула ишлеп бетон къуйгъандыла, жауун суу саркъырча системаны, темир бурууланы да жарашдыргъандыла. Ызы бла  юсюне  геосетка жасап юч къат  асфальт жайгъандыла, жорукъланы билдирген белгилени эм термопластикден ызла да тартылгъандыла. Андан сора да, суу таламазча  череклени жагъаларын бетон плитала бла кючлегендиле эм тийресин да айбатландыргъандыла. Кече  жолну жарытырча чыракълы чыпынла да салыннгандыла. Жаяу жюрюгенлеге таплыкъгъа уа  жолну эки жаны бла да перилалары бла тротуарла ишленнгендиле.

Келир жыл июлню ахырына дери «Прохладный — Баксан — Элбрус» А-158 федерал жолда Огъары Бахсанны къатында Адыр Сууну кёпюрюне да тынгылы ремонт этилип бошаллыкъды. 

Быйыл жайда специалистле  аны сол жанын чачып бошап чигинжилерин къуярча жумушла бла  кюрешедиле. Ол себепден ишле баргъан кезиуде машинала ревирсив халда кёпюрню онг жаны бла жюрюйдюле.