Назмула, жырла, саугъала да

Бу кюнледе Нальчикде Мечиланы Кязим атлы къырал жаш тёлю библиотекада «Китапны бетлерин барыбыз да бирге ачайыкъ» деген ат бла байрам озгъанды. Ол республиканы жюзжыллыгъын белгилеуню чеклеринде къуралгъанды.

Тюбешиуге уа жаш художник Хаджиланы Жамиля, журналистле эмда акъ сёз бла жазгъанла Марина Мазуренко («Кабардинео-Балкарская правда»), Зарема Куготова («Адыгэ псалъэ») келгендиле. Ала кеслерини чыгъармачылыкъларыны юслеринден женгил промышленность колледжни окъуучуларына хапарлагъандыла.

Ала кеслерини назмуларын, сурталарыны интернетде къалай табаргъа боллугъун да билдиргендиле. Андан сора да, жаш тёлю, жаланда классиканы неда белгили авторланы чыгъармаларын угъай, бюгюнлюкде жангыча жазгъанланы окъургъа боллукъларыны, ала къаллай сейир темаланы ачыкълагъанларыны юсюнден айтхандыла. Назмуларын да эшитдиргендиле.

Жамиля уа суратны къаллай илхам бла ишлегенин, ала жанлары болгъан бир сейир затлагъа ушагъанларын, аны себепли уа ол этген суратлары бла байламлы артдан-артха къысха хапарчыкъла, жомакъла эазып башлагъанын да ангылатханды. Тюбешиуге келгенлеге кесини чыгъармаларындан окъугъанды. Аланы барысын да жыйышдырып китап чыгъарыр умуту барлыгъын да айтханды.

Къонакъбайла китапхананы директоруну орунбасары Лариса Садыкова уа къонакълагъа алада хар бёлюм къалай ишлегенини юсюнден билдириу этгенди. Китап бла шуёхлукъ жюрютюрге чакъыра, колледжде окъугъанла кеслерини усталыкълары бла байламлы литератураны да мында табаргъа болллукъларын ангылатханды. Андан тышында да, тюрлю-тюрлю журналла барлыкъларын айтханды.

Байрамгъа искусстволаны колледжинде КъМР-ни сыйлы артисткасы Таукенланы Галинаны классында окъугъан жашла бла къызла да келгендиле. Ала уа, жыйылгъанлагъа концерт берип, республикабызны белгили авторларыны жырларын эшитдиргендиле. Сёз ючюн, Атабийланы Алибек-«Ладонь для птиц», Къулийланы Заур-«Гордость горца, Инна Лаптева уа «Универистетский вальс» деген жырланы айтып, залдагъыланы хунерлери бла къууандыргъандыла.

Китап байрамгъа ол кюн дагъыда Нальчикни алтынчы  номерли битеулю билим берген мектебини тёртюнчю классларына жюрюгенле да  къатышхандыла. Школчула назмула окъугъандыла, республиканы айныууну юсюнден видео-фильмге да къарагъандыла. Дагъыда сабийлеге алгъадан бардырылгъан сурат ишлеу жаны бла конкурсда айырмалы болгъанлары ючюн саугъала, грамотала берилгендиле.

Андан сора да, ол кюн бери келгенле ара шахарыбызны жылдан -жылгъа къалай тюрлене, айный баргъаныны юсюнден сурат,  китап эмда периодикалы басма кёрмючлени кёрюрге да онг тапхандыла. Сабийле тышында арбазда суратла да ишлегендиле.

Суратланы Артур Елканов алгъанды.