Алгъышла, насийхат сёзле, саугъала да

Билимни кюнюн Долинскдеги 8-чи номерли мектеп, тёреде болуучусуча, назмула, жырла эмда тепсеуле бла  белгилегендиле. Биринчи классха келгенлеге уа бютюн жарыкъ тюбегендиле. Ала юч класс боладыла – 85 жашчыкъ бла къызчыкъ.  Аланы  къолларында тюрсюнлю шарла, гюлле да  бардыла. Сабийле  омакъдыла, жарыкъдыла. 

Окъуу юйню директору Геккиланы  Далхатны къызы Зарема   байрамгъа келгенлени Билимни кюню эмда Къабарты-Малкъарны 100-жыллыгъы  бла алгъышлагъанды, окъуучулагъа насийхат сёзле айтханды, устазлагъа   ишлеринде жетишимли болурларын тежегенди. 

Байрамгъа  шахар администрацияны билим бериу департаментини келечиси Маухат Бахова да келгенди эмда окъуучуланы, ата-аналаны, устазланы да  алгъышлагъанды.

Тёреде болгъаныча, 11-чи классны окъуучулары  школгъа биринчи кере келгенлеге саугъала бергендиле.

Биринчи къонгъуроуну  уа бу мектепде  1-чи классда окъурукъ Жаппуланы Далия бла Мамайланы Алан, 11-чи  классдан а Атаккуланы Ислам бла Биттирланы Салима эшитдиргендиле.

Ызы бла  гитче жашчыкъла бла къызчыкъла  кёкге шарларын  къолчукъларын булгъай ашыргъандыла. Сора устазлары бла класс кабинетлерине  барып, парталарына олтургъандыла.

Суратлада: биринчи къонгъуроуну эшитдириу; биринчи «Б» классны окъуучулары устазлдары Юсюпланы Роза бла; директор,  Геккиланы Зарема сёлешеди; тепсеп къууандыргъандыла.

Тау элде байрам

Бызынгыда мектепни арбазы окъуу жылны ачылыууна ариу жасалгъанды.  Жарыкъ макъамла   узакъгъа эшитиледиле. Къууанчлы линейкагъа келгенлеге  окъуу юйню директору Хапаланы  Тахир,  Черек районну  билим бериу эмда  жаш тёлю политика  жаны бла   бёлюмюню таматасыны орунбасары  Аттоланы Алик,  устазла да  жарыкъ тюбегендиле.

-Акъылман Кязим: «Билимсиз адам тилсиз кибикди», - деп бош айтмагъанды. Аны эсге алып, не къадар кёп белирге, устазла айтханны дайым да этерге керексиз.  Ала уа сизге жаланда игилик тежейдиле. Алайды да, ахшы жолгъа! Хайт дегиз!»,-дегенди  Хапа улу.

-Бу  гитче тау элчикден кёп белгили адамла чыкъгъандыла. Аланы араларында  генералла, алимле, врачла, артистле  да бардыла. Сиз да, алача  атыгъызны иги бла айтдырлыгъыгъызгъа ийнанама,- дегенди  Аттоланы Алик.

Биринчи къонгъуроу таууш эшитилгенден сора, окъуучула  классларына  кирип, аны бла шагъырейленнгендиле.

Быйыл Бызыннгыда биринчи классха  тёрт къызчыкъ баргъандыла. 9-чу классха –жетеулен, 11-ге да  алты адам.

Суратлада: Бызынгыда биринчи классха баргъан къызчыкъла устазлары Аналаны Зухура бла.

Ёхтемленирча шартны эсге салып

Хасанияны Фрийланы Рамазанны атын жюрютген 16-чы номерли мектебинде  жангы окъуу жылны башланнганына жораланнган линейка къууанчлы халда ётгенди. Бери окъургъа  биринчи кере келген жашчыкъла  бла къызчыкъла кеслерине бютюн уллу эс бурдургъандыла. Ала жарыкъ магъам согъула, экеу- экеу болуп,  арагъа чыкъгъандыла. Устазлары Темуккуланы Светлана бла Уяналаны Назиля уа алагъа  жарыкъ тюбегендиле.

Быйылдан башлап, белгилисича,  битеу окъуу юйледе байрам кюнледе Россейни бла Къабарты-Малкъарны байракълары кётюрюледиле. 16-чы номерли орта школда ол сыйлы жумуш  Ностуланы Тенгизге бла  Марина Карахадинагъа буюрулгъанды.

Школчуланы, устазланы, ата-аналаны да  жангы окъуу жыл бла, КъМР-ни 100-жыллыгъы бла да  мектепни директору Къалабекланы Любовь Хусейевна, шахар округну билим бериу департаментини келечиси Зарина Кертбиева да алгъышлагъандыла. Ала байрамны  аллында  Минги тауну башына  республикада биринчи болуп, бу школну логотипи эмда баннери   чыгъарылгъанын да ёхтемленип сагъыннгандыла.

Биринчи къонгъуроуну уа 11-чи классны бла 1-чи классны  окъуучулары  Баккуланы Алина бла   Созайланы Альберт эшитдиргендиле.