Жаш предпринимательлеге себеплик этиуню амаллары сюзюлгендиле

КъМР-ни Башчысы Казбек Коков Предпринимательликни кюнюнде Къабарты-Малкъар Республиканы предпринимательликге себеплик этген «Мой бизнес» деген арада болгъанды.
Бу ара 2019 жылда «Гитче эм орта предпринимательликге бла энчи предприниматель башламчылыкълагъа себеплик этиу» миллет проектге кёре къуралгъанды. Аны иши «бир терезени» амалы бла бардырылады. Мында предпринимательлеге  жангылыкъланы билдириледиле, тюрлю-тюрлю амалла бла шагъырей этедиле, ишни къураргъа, сертификат алыргъа, предприятияла чыгъаргъан продукцияны юсюнден хапар жаяргъа, бизнес планланы жарашдырыргъа болушадыла. «Ишибизни баш жоругъу – хар кимге энчи кёзден къарауду, къолдан келген болушлукъну аямауду»,- дегендиле арада ишлегенле.
 Казбек Коков ара бла байламлыкъда ишлеген жаш бизнесменле бла да ушакъ этгенди. Ала республиканы оноучусуна бизнеслерин айнытыу жаны бла оюмларын билдиргендиле. Аланы бир бирлерин Казбек Коков эсге алгъанды эмда КъМР-ни Экономиканы айнытыу министерствосуна ала оюмлай къалмазча, онг болгъаны къадар, жашауда бардырылырча этерге буюргъанды.Аллай оюмладан бири – инфраструктура бла себеплик этерге кереклисиди.

Тюбешиуню кезиуюнде жаш предпринимательле дагъыда туризм бла байламлы  башламчылыкъларын да туура этгендиле. Ала «Нальчик» курортну айнытыуну инвестициялы мастер-планлары жарашдырыла туруп эсге алынырыкъдыла.

Республиканы продукциясыны юсюнден хапар билдирип турлукъ маркетологла жетишмегенлерини юсюнден да айтылгъанды ушакъны кезиуюнде. Аланы республиканы бийик билим берген окъуу юйлеринде хазырларча мадарла этерге керек болгъаны чертилгенди.

Казбек Коков жаш бизнесменлени профессионал байрамлары бла алгъышлагъанды, ишлеринде жетишимли болурларын сюйгенин билдиргенди. «Ма аллай  адамлагъа, алача башхалагъа да, аланы башламчылыкъларына, туугъан жерлерин айнытыргъа талпыныуларына кёре да болады шёндюгю жашауубуз»,- дегенди Казбек Коков. «Бюгюнлюкде жаш предпринимательлеге, артыкъда бизнеслерин районлада къурагъанлагъа, ишчи жерле ачханлагъа себеплик этиуню магъанасы бек уллуду. Муниципал администрацияла аланы айныуларына онг болгъаны къадар болушургъа борчлудула»,- деп къошханды ол.
 Араны башчылары эмда бизнесни айнытыу бла байламлы институтланы башха келечилери бла да бардырылгъан кенгешде уа Къабарты-Малкъар Республиканы  предпринимательлик бла кюрешген гитче эмда орта субъектлеге гитче кредитле бериуню фондну къошакъ халда толтурууну, ол санда регион бюджетден, онглары да сюзюлгендиле.  2021 жылда Фонд 70 миллион сом чакълы бирге  166 займ бергенди. КъМР-ни Гарантиялы фонду уа 2021 жылда 280 миллион сом чакълы бирге банк кредитле алыргъа 40 чакълы поручительство бла себеплик этгенди. Партнёр банкла да фондну поручительствосуна таянып, миллиард сомдан артыкъ бергенди кредитге.

Экспортха себеплик этиу да араны баш магъаналы ишлеринден бириди. 2021 жылны ичинде халкъла аралы электрон сатыу-алыу майданлагъа республиканы  44 компаниясыны, 14 предприятиясыны продукциялары салыннгандыла, экспорт келишимле да этилгендиле. Беш предприятиябыз а жылны бек иги экспортёрларына саналгъандыла, дегенди араны башчысы Мадина Дудуева.
Санкцияла къысыулукъ этип тургъан кезиуде бизнесни айнытыу бютюн  уллу магъананы тутханын белгилей, Казбек Коков бизнесге себеплик этиу жаны бла РФ-ни Правительствосу берген жангы онгланы не къадар толу хайырланыргъа кереклисин эсгертгенди. Ол дагъыда предпринимательлеге къыралны жанындан къаллай болушлукъ этилгенини, къаллай онгла берилгенлерини юслеринден билдирип туруу жаны бла ишни да кючлендирирге буюргъанды.
 Кенгешге КъМР-ни экономииканы айнытыу министри Рахайланы Борис,  КъМР-ни предпринимательликге себеплик этиуню арасыны директору Мадина Дудуева, КъМР-ни Айнытыуну корпорациясыны директору Чочайланы Ахмат, КъМР-ни  Гарантиялы  фондуну директору Бечелланы Залим, КъМР-ни предпринимательликни гитче эм орта субъектлерине гитче кредитле бериуню фондуну директору Мечиланы Камиль, Къабарты-Малкъарны бизнес-инкубаторуну оноучусу Аскер Тхабисимов, КъМР-ни социал жаны бла инновацияланы арасыны башчысы  Сергей Шестирублев да къатышхандыла.